Монголоор дайрах эдийн засгийн коридорын үүрэг цар тахлын үед улам өснө

БНХАУ, ОХУ-ын холбогдох албаныхан өнгөрсөн пүрэв гаригт цахим хурал хийж, БНХАУ-Монгол-ОХУ эдийн засгийн коридорыг цар тахлын үед хэрхэн үр дүнтэй ашиглах вэ гэдэг асуудлыг хэлэлцжээ. Хурлыг БНХАУ-ын ШУА-ийн ОХУ, Дорнод Европ, Төв Азийн хүрээлэнгийн захирал Сунь Чуанжи удирдсан байна.

Хуралд оролцогчид цар тахалтай холбоотойгоор олон улсын эдийн засаг, улс  төрийн харилцааг дахин зохион байгуулах шаардлага тулгарч байгааг хүлээн зөвшөөрчээ. Дэлхий дахинд болон бүс нутгийн төвшинд гүн гүнзгий өөрчлөлтүүд гарч байгааг мөн тодорхой жишээ гарган задалж ярилцжээ.  

ОХУ, Монгол, БНХАУ-ыг дамнасан эдийн засгийн коридор цар тахлын энэхүү нөлөөнд гарцаагүй өртөнө, гэхдээ Зүүн Хойд Азийн худалдаа эдийн загийн шинэ үед үүрэг ач холбогдол нь улам ч ихэснэ гэсэн дүгнэлтийг хуралд оролцсон эрдэмтэд хийжээ.

Цар тахлын үеэр эдийн засгийн коридорт оролцогч гурван улс харилцан итгэлцлээ өндөр төвшинд баталгаажуулж авсан нь цаашдын хамтын ажиллагааг хөгжүүлэхэд чухал ач холбогдолтой болсон бөгөөд цаашид гурван улсын өмнө цар тахалтай тэмцэж бүрэн устгах амаргүй даалгавар хүлээж байгаа гэдэгт мөн санал нэгджээ.