Орхон аймаг: COVID-19 илэрсэн хоёр хүнийг өнөөдөр ХӨСҮТ-д шилжүүлэн эмчилнэ

 Өнөөдөр /2020.05.18/ ОХУ-аас 340 оюутан татан авснаас 57-д нь коронавирус илэрсэн. Хойд хилээр орж ирсэн 400 гаруй хүнээс өчигдөр Орхонд 2 тохиолдол бүртгэгдсэн нь оюутан, Дарханд 1 тохиодол бүртгэгдсэн нь мөн оюутан. Ингээд ОХУ-аас хойд хилээр орж ирсэн хүмүүсийн 40 хүнд коронавирус илэрсэн гэх мэдээллийг ХӨСҮТ-өөс мэдээлсэн.

Тэгвэл Орхон Аймгийн Засаг даргын ээлжит шуурхай зөвлөгөөн цахимаар хуралдлаа. Шуурхай зөвлөгөөний үеэр зарим нэг хэлтэс, агентлагийн удирдлагууд цаг үеийн шинжтэй мэдээлэл хийв.

 Аймгийн хувьд ОХУ-аас орж ирсэн 119 иргэнийг авч ажиглалт, тусгаарлалтын байранд байршуулаад байгаа бөгөөд 2 иргэнийг сэжигтэй тохиолдол гэж үзэн БОЭТ-ийн Халдвартын тасагт шилжүүлж сорьцын шинжилгээ авч Дархан-Уул аймгийн вируслогийн лабораторид шинжлүүлэхэд 2 сорьц эерэг гарсан бөгөөд ХӨСҮТ-д баталгаажуулах шинжилгээ хийхэд COVID-19 болох нь тогтоогджээ. Эдгээр хоёр иргэнийг БОЭТ-ийн халдвартын тасагт эмчилж байгаа бөгөөд өнөөдөр Улаанбаатар хот руу шилжүүлэн ХӨСҮТ-д үргэлжлүүлэн эмчлэхээр боллоо.
         Эх сурвалж: Орхон-Уул аймаг Мэдээллийн төв