SOS: Цаг агаарын гамшигт үзэгдэл гурван хоног үргэлжилнэ

Маргаашнаас буюу энэ сарын 15-17 хүртэл нийт нутгаар цаг агаарын гамшигт үзэгдэл болохыг УЦУОШГ, ОБГ-аас мэдээллээ.

Маргааш Хэнтий, Сүхбаатар, Говьсүмбэр, Дорноговийн нутаг, Төв, Дундговийн зүүн хэсгээр салхи секундэд 26-28 метр, зарим үед 34 метр хүртэл ширүүсэн хүчтэй шороон шуурга шуурч, Төв, Хэнтий аймгийн хойд хэсгээр хүчтэй цасан шуурга шуурч цаг агаарын гамшигт үзэгдэл болах аж.

Мөн Өвөрхангай, Өмнөговь, Дорнодын нутаг, Төв, Дундговийн баруун хэсгээр салхи секундэд 16-18 метр, зарим үед 24 метр хүртэл ширүүсэн, хүчтэй шороон шуурга шуурна.

Энэ сарын 14-нөөс 15-нд шилжих шөнө төвийн аймгуудын нутгийн хойд хэсгээр, 15-нд төв, говь, зүүн аймгуудын нутаг, 16.17-нд нутгийн зүүн хагаст, ялангуяа Хэнтий аймгийн нутгаар нойтон цас орж, хүчтэй шороон болон цасан шуурга шуурч, эрс хүйтрэхийг онцгойлон анхааруулж байна.

2008 онд энэ удаагийнхтай ижил цаг агаарын гамшигт үзэгдэл гарч байжээ. Энэ үеэр 52 хүний амь эрсдэж, 324,000 мал хоргодож, эрчим хүчний болон холбооны шонгууд нурж, 100 гаруй гэр, байшингийн дээвэр хийсэж байжээ.

Тиймээс эдгээр өдрүүдэд малчид малаа уруудахаас сэргийлэх, хашаа хорооноосоо гаргахгүй байхыг зөвлөж байна.

Бага насны хүүхдийг малд явуулахгүй байх, хээр гадаа үлдээхгүй байх, гадна тоглуулахгүй байхыг анхааруулж байна.