Японд МУ-ын 277 иргэн орон байргүй болоод байна

Эрүүл мэндийн яамны өнөөдрийн мэдээллийн үеэр “Европын орнуудаас Азийн орнууд руу коронавирусын халдварын дараагийн үе тархаж байж болзошгүйг эрдэмтэд мэдээлж байнгааг хэлсэн. Тодруулбал, Азийн орнууд дахь халдвар авсан иргэдийн тоо дахин нэмэгдэж эхэллээ” гэсэн мэдээлэл өгсөн юм. Тухайлбал, Япон улсад сүүлийн 24 цагийн байдлаар халдварын батлагдсан тохиолдол 70 бүртгэгдэж, есөн хүн нас баржээ.  Тэгвэл тус улсад манай улсын 12 мянга орчим хүн ажиллаж, амьдардаг бөгөөд тэдний 1050 нь эх орон руугаа буцах хүсэлтээ гаргаад байгаа юм байна. Тэдний дунд жирэмсэн 13, хөгжлийн бэрхшээлтэй нэг, өндөр настан 26, 0-5 насны хүүхэдтэй гэр бүл 31, МУ-д эмнэлгийн хяналтад байдаг 15 иргэн байгаа аж. Тэдгээр иргэдийн эх орон руугаа буцах бас нэг зайлшгүй шалтгаан нь санхүүгийн бэрхшээл бөгөөд нийт 277 хүн санхүүгийн болон орон байрны асуудалд ороод байгаа аж. Иймд эх орон руугаа буцахаар хүсэлтээ гаргаж, өнөөдөр Япон дахь Элчин сайдын яамны үүдэнд тайван тайван жагсаал зохион байгуулж байгаа юм байна.  Коронавьирусийн үед олноор цуглаж болохгүй шалтгаанаар Япон дахь монгол иргэд 4-5 хүнээ төлөөлөн уг жагсаалыг зохион байгуулж байгаа юм.

Тэд гадаа хонохдоо дэлгүүрээс ойр зуурын зүйлс худалдан авч идэх, үйлчилгээний газруудын ариун цэврийн өрөөг үе үе амьдрах зориулалтын байр мэтээр ашиглах, ахмад настай иргэдийн даралт ихсэх, жирэмсэн иргэд эмнэлгийн тусламж авахаар очиход “жирэмсэн байх нь өвчин биш” гээд хүлээж авахгүй байх зэрэг олон бэрхшээлтэй тулгарч байгаагаа хэлж байна.