Москвад бүх төрлийн тээврийн хэрэгслээр явахын тулд электрон зөвшөөрлийн бичиг авч байхаар боллоо

ОХУ-д шинэ коронавирусийн цар тахлын нөхцөл байдал Итали, Испани, АНУ зэрэг улсуудыг бодвол харьцангуй гайгүй байгаа ч шинэ тохиолдлын тоо хангалттай буурахгүй байна. Дөрөвдүгээр сарын 11-нд ОХУ-д 13 мянга 584 тохиолдол бүртгэгдсэн. Өнгөрсөн хоногийн дотор шинээр 1667 тохиолдол бүртгэгдэж, 106 хүн нас барсан байна.

Иймд Москвагийн эрх баригчид иргэдийн шилжилт хөдөлгөөнийг хязгаарлах үүднээс бүх төрлийн тээврийн хэрэгслээр зорчих цахим үнэмлэх нэвтрүүлжээ. Өнөөдрөөс эхлэн иргэд нь эмнэлэг эмийн сан орох, зайлшгүй шаардлагаар ажилд явах гээд бүх л зорилгоор метро, автобус, такси, хувийн авто машин зэргийг ашиглан хөдөлгөөнд оролцох бүрдээ цахим нэвтрэх үнэмлэх авч байхаар болсон байна.

16 оронтой цахим зөвшөөрлийн Москва хотын захиргааны сайтаас эсвэл тусгай дугаар руу SMS явуулан авах боломжтой. Цахим зөвшөөрөл нь ажилд явах, эмнэлэгт үзүүлэх ба хувийн хэрэгцээгээр гэсэн гурван төрөл байна. Хувийн хэрэгцээгээр тээврийн хэрэгсэл ашиглах зөвшөөрлийг долоо хоногт хоёроос илүү удаа өгөхгүй юм байна. Мөн өнөөдрөөс эхлэн Москвагийн хотын цагдаа нар тээврийн хэрэгслийг зогсоон цахим зөвшөөрлийг нь шалгаж байхаар болов. Иргэд цахим зөвшөөрөл болох 16 оронтой тоог бичиж, зургийг нь авч хадгалан биедээ авч явах ёстой. Зөвшөөрөлгүйгээр тээврийн хэрэгсэл жолоодсон, түүгээр зорчсон тохиолдолд цар тахлын үеийн хөл хорионы дэглэмийг зөрчсөнд тооцон 5000 рублиэр торгох аж. Таксины жолооч нар дуудлагаар очихдоо зорчигчдоос цахим зөвшөөрлийг нь шаардаж байхаар болжээ.