УОК: Дараагийн нислэгийг энэ сарын 17-нд Сөүл рүү хийхээр төлөвлөж байгаа

Улсын Онцгой комиссоос өнөөдөр ээлжит хурлаа хийж байна.

Хурлын үеэр ОБЕГ-ын дарга Т.Бадрал тусгай үүргийн нислэгийн талаар мэдээлэл хийлээ.

Тэрбээр "Дэлхийн 43 улсаас 6,000 гаруй иргэн эх орондоо ирэх хүсэлтээ өгөөд байна. Шалтгаанаар ангилан үзвэл:

• Бага насны хүүхэдтэй гэр бүл 830 
• Эрүүл мэндийн шалтгаантай 86 
• Өндөр настан 278
• Жирэмсэн 32
• Бага насны хүүхэд 307
• Оюутан 973
• Байрлах газаргүй болсон 409
• Санхүүгийн боломжгүй болсон 89 болон бусад шалтгаантай 4,000 гаруй иргэн байгаа. Санхүүгийн боломжгүй болсон иргэдийн ихэнх нь Австралид байгаа монгол иргэд юм. Тэднийг хэрхэн татах талаар тус улстай холбогдох мэдээлэл солилцож байна.

4-р сарын 17-нд Сөүл рүү нислэг хийнэ. Энэ онгоцоор АНУ, Австрали зэрэг улсаар дайран ирэх нэн яаралтай гэсэн ангилалд багтах иргэдээ эхний онгоцонд суулгана.

Сүүлийн өдрүүдэд иргэдийн анхаарал сэрэмж суларч, хөдөлгөөн ихсэх хандлага ажиглагдаж байна. Тиймээс ирэх даваа гарагаас эхлэн хязгаарлалтын тодорхой арга хэмжээ авахаар төлөвлөж байна гэв.