Өдөрт гал түймрийн 10-20 дуудлага гарч байна

 Өчигдөр л гэхэд Яргайтын Богинын аманд гарсан галд найман айлын зуны байшин өртжээ.Тодруулбал, Дуудлагын дагуу Сүхбаатар дүүргийн Онцгой байдлын хэлтсийн Гал түймэр унтраах, аврах 74, 34 дүгээр анги, Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн нийт 41 алба хаагч, 11 автомашин техник хэрэгсэлтэйгээр ажилласан байна. Гал түймэрт нийт найман айлын зуны байшин өртөж, алба хаагчид түймрийн аюулаас 38 айлын байшин болоод ногоон бүсийг авран хамгаалжээ.Нийслэлийн нутаг дэвсгэрт хуурайшлын зэрэг их, түймрийн эрсдэл өндөр буюу АЮУЛТАЙ түвшинд байна.

Ойн тухай хуулийн 3,1,17 дахь заалт "Түймрийн аюултай үе" гэж тухайн нутаг дэвсгэрт ой хээрийн түймэр гарах байгалийн нөхцөл бүрдсэн хуурайшилт бүхий цаг хугацаа буюу жил бүрийн 3 дугаар сарын 20-ны өдрөөс 6 дугаар сарын 10-ны өдөр, 9 дүгээр сарын 20-ны өдрөөс 11 дүгээр сарын 10-ны өдөр хүртэлх хугацааг хэлж байгаа юм. Иймд ой хээрийн түймрээс урьдчилан сэргийлэхийн тулд ИРГЭН бүр сонор, сэрэмжтэй байх хэрэгтэйг НОБГ-аас анхаарууллаа.