Өнөөдөр гуравдугаар сарын 22

Өнөөдөр гуравдугаар сарын 22. Энэ өдөр дараах тэмдэглэлт үйл явдлууд давхацдаг.

Өдөр шөнийн тэнцэл

Хаврын өдөр шөнийн тэнцэл өнөөдөр тохионо. Өөрөөр хэлбэл өнөөдөр нарны шууд тусгал Экватор дээр байгаа тул дэлхийн бүх газарт өдөр шөнө тэнцдэг.

Монгол хүн сансарт ниссэн өдөр

Өнөөдрөөс 39 жилийн өмнө Монгол Улсын иргэн, сансрын нисгэгч Жүгдэрдэмидийн Гүррагчаа ЗХУ-ын сансрын нисгэгч В.А Жанибековын хамтаар  хуучнаар ЗХУ-ын Байконуур дахь сансрын хөлөг хөөргөх талбайгаас “Союз-39” хөлгөөр хөөрсөн билээ. Тэд сансарт нийт найман өдрийн турш дэлхийг 124 удаа тойрч, гуравдугаар сарын 30-нд эх дэлхийдээ амжилттай газардсан юм. Энэхүү үйл явдал нь Монгол Улс сансрын уудамд техникээ гаргаж туршсан дэлхийн тав дахь орон, сансрын судалгааны төхөөрөмж бүтээж, нислэгийн явцад ашигласан 20 дахь орон, өөрийнхөө сансрын нисгэгчийг нисгэсэн дэлхийн арав дахь орон болж, түүхэнд нэрээ мөнхөлсөн юм

Наурызын баярын өдөр

Казак түмний эртнээс уламжлан тэмдэглэж ирсэн хаврын баяр, “нарны баяр”-ын өдөр. Монгол Улсын алс баруун хязгаарт болон улс даяар тархан суугаа хөдөлмөрч, зочломтгой, найрсаг ард түмэнд нарны баярын мэнд хүргэж байна. 

Дэлхийн усны өдөр

НҮБ-аас энэ өдрийг Дэлхийн усны өдөр болгон тэмдэглэж байхаар шийдвэрлэж,  албан ёсоор 1993 оноос тэмдэглэж эхэлжээ. Цэвэр усны гачигдалд байгаа олон улс орныг усны гачигдлаас гаргах, цэвэр усны нөөцийг нэмэгдүүлэх, арвилан хэмнэх зорилго бүхий НҮБ-ын уриалгыг Монгол Улсын Засгийн газар дэмжиж, манай улс 2005 оноос хойш “Дэлхийн усны өдөр”-ийг тэмдэглэх болсон юм.