Францад нэг хоногийн дотор 500 хүн Covid-19-өвджээ

Францад нэг хоногийн дотор бараг 500 хүн Covid-19 өвчний халдвар шинээр авч, нийт халдвартай хүний тоо 2,3 мянгад хүрсэн байна. Энэ өвчний улмаас нас барсан хүний тоо 48 болсон тухай Францын Эрүүл мэндийн сайд Оливье Веран мэдэгджээ. Тэрээр лхагва гарагт хэвлэлд зориулан мэдээлэл өгөхдөө “Өнөө оройны байдлаар халдвар авсан 2281 тохиолдолд бүртгэгдээд байга нь  өчигдрийнхөөс бараг 500-аар илүү байна. Эрчимт эмчилгээний тасагт 105 хүн хэвтэж байна гэжээ.

Мягмар гарагт Францад халдвар авсан хүний тоо 1784, нас барсан хүн 33 байсан юм.

Францад ойрын үед коронавирусийн тархалт оргил үедээ хүрнэ гэж тооцсон байгаа тул тэтгэвэртээ гарсан эмч нарыг буцаан ажилд авах талаар ярьж эхэлсэн байна. Францын эмч нарын үндэсний нэгдлийн тэргүүн Патрик Буэ “Бид таваас цөөн жилийн өмнө  тэтгэвэрт гарсан эмч болгон руу биечлэн утсаар ярина. Францад өнөөдөр тэтгэвэрт гараад таваас цөөн жил болсон 40 мянга гаруй эмч бий” гэжээ.

Байдал ийм ноцтой болж байгаатай холбогдуулан Францын Ерөнхийлөгч Эммануэль Макрон өнөөдөр улс үндэстэндээ хандан үг хэлэхээр болсон гэж байна. Үүнээс өмнө Макрон нь мягмар гарагт үндэстэндээ хандан мэдэгдэл хийж, “Франц улс коронавирусийн тахлын эхэнд явж байна” гэж мэдэгдэж байсан юм. Харин одоо үг хэлэхдээ тахлын хамгийн дээд гуравдугаар шатанд хүрсэн тухай мэдэгдэх бололтой.