Сайдууд он дуустал бүх төрлийн шагнал, урамшууллаас татгалзлаа

Гэхдээ татгалзсан сайдууд нь Украйны Засгийн газрын гишүүд. Украйны Засгийн газрын тэргүүн Дэнис Шмыгаль сайдууд нь он дуустал бүх төрлийн нэмэгдэл, урамшуулал, шагнал цалин авахаас татгалзаж байгаа тухай хэвлэлийн бага хурал дээр албан ёсоор мэдэгджээ. Тэрээр “Энэ бол улс төрийн шийдвэр ч гэлээ тун чухал. Сайд нар он дуустал шагнал, урамшуулал авахаас татгалзлаа. Тэгээд улс төрийн албан тушаалыг дагалддаг шагнал, урамшуулал, нэмэгдэл цалинг бүтэн жилийн ажлын дүнгээр хэлэлцэн ярилцаж байж шийдэж байхаар боллоо” гэжээ.

Ингээд зогссонгүй сайд нарын танхимын гишүүдийн цалин нь Украйны дундаж цалингаас дээд тал нь тав дахин их байхаар тогтсон байна. Мөн хуулийн дагуу ажлын ачааллын нэмэгдэл цалин гэж авах ёстойг цалингийн 30 хувиас хэтрэхгүй байх ёстой гэж тогтожээ.

2019 оны сүүлээр Украйны дундаж цалингийн хэмжээ 12 мянга 264 гривен байсан. Нэг ам.долларын ханш 25,66 гривен гэхээр Украйны сайд нар үүнээс тав дахин өндөр цалин авах боломжтой бол хэдий хэмжээний цалин авахыг та тооцож үзээрэй.

Ийм шийдвэр зүгээр нэг гараагүй, Ерөнхий сайд нь улс төрийн шийдвэр гэж зүгээр нэг хэлсэнгүй. 2020 он гарсны дараахан Засгийн газрын зарим гишүүд өөрсдөдөө 100-200 мянган гривений шагнал, урамшуулал, нэмэгдэл, илүү цагийн цалин бичүүлж авсныг сэтгүүлчид ил болгож, эдийн засгийн хувьд тун хүнд байдалд байгаа украйнчуудын уур бухимдлыг маш ихээр хүргэсэн. Сарын 490 ам.долларын цалинтай улсад сайд нар нь зөвхөн шагнал цалин гэж сар болгон 7700 ам.доллар аваад байхаар сонгогчид нь яаж ч баярлах билээ.

Тухайлбал, ГХ-ийн сайд асан Вадим Пристайко өнгөрсөн оны арванхоёрдугаар сард өөртөө шагнал, эмчилигээний мөнгө, ар гэрийн гачигдал гэж 100 мянга гаруй гривен бичиж олгох тушаалд гарын үсэг зурсан бол, илүү цаг ба шагнал цалин мөнгө ади хэмжээний цалин бичиж авсан байна. Түүнчлэн Хууль зүйн сайд, Эдийн засгийн сайд, Нийгмийн халамжийн сайд нар нь мөн адил өөрсдөө өөрсдөдөө асар их шагнал цалин, илүү цагийн бичүүлж авсан байж.

Гэтэл эдийн засаг, санхүүгийн маш хүнд байдалд орсон гэдэг шалтгаанаар Украйны төсвийн ажилчдад өгөх ёстой цалингийн өр 3 тэрбум гривен давж гараад байгаа аж.