Афганистаны Засгийн газрын цэрэг баасан гарагаас дайралтад шилжинэ

Афганистаны Засгийн газрын мэдлийн цэрэг “Талибан” хөдөлгөөнийг төрийн объектууд руу хийж байгаа дайралтаа нэн даруй зогсоохгүй бол баасан гарагаас давшилтад шилжих тухайгаа албан ёсоор мэдэгджээ. Афганистаны Батлан хамгаалахын сайдын үүрэг гүйцэтгэг Асадулла Халид нь “Reuters” агентлагт мэдээлэхдээ “Афганистаны зэвсэгт хүчин Ерөнхийлөгч Ашраф Ганийн өгсөн тушаал ба АНУ ба талибууд хоорондын энхийн гэрээний дагуу баасан гараг хүртэл хориглолтын горимд байна. Гэхдээ “Талибан” нь дайралтаа энэ хооронд зогсоогоогүй тохиолдолд манай цэрэг давшилтад орно” гэжээ.

АНУ нь хоёрдугаар сарын 29-нд Афганистаны “Талибан” хөдөлгөөнтэй энхийн гэрээ байгуулсан юм. Гэрээ ёсоор АНУ ба түүний холбоотнууд 14 сарын дотор Афганистанаас цэргээ гаргах баталгаа гаргаж өгсөн. Хариуд нь талибууд АНУ ба түүний холбоотнуудын эсрэг аюул учруулсан үйлдэл хийхэд Афганистаны газар нутгийг түшиц болгон ашиглахгүй байх үүрэг хүлээсэн. АНУ-ыг цэргээ гаргасны дараа үлдэх Афганы Засгийн газар ба талибуудын хооронд гал зогсоох тухай хэлэлцээ гуравдугаар сарын 10-нд эхлэх ёстой байсан. Үүний өмнө талуудыг итгэлцлийг нэмэгдүүлэх үүднээс Засгийн газар талибын талыг баримтлагч 5000 хүнийг олзноос суллаж, талибууд өөрийн олзонд байгаа 1000 орчим хүнийг суллах ёстой байв.

Гэвч “Талибан” хөдөлгөөний зэвсэгт дайчид АНУ-ын цэргийг бүрэн ялсан гэж мэдэгдээд, Афганистаны Засгийн газрын эсрэг бүрэн хэмжээний байлдааны ажиллагааг эхлүүлж байгаагаа мэдэгдсэн юм. Талибан хөдөлгөөн нь Афганистаны Засгийн газрыг зөвхөн Америкийн санхүүгийн болон цэргийн дэмжлэгийн ачаар дэнжгэнэж байдаг тоглоомын Засгийн газар гэж үздэгээ нуудаггүй.

Дээр нь Афганистаны Засгийн газарт Ерөнхийлөгчийн сонгуультай холбоотой хагарал үүсэж, Ерөнхийлөгч ба дэд Ерөнхийлөгчийн талынхан тус бүртээ зэрэгцээ Засгийн газар байгуулж, мужуудад өөр өөрсдийн хүнийг амбан захирагчаар томилон захирагдахыг шаардаж, ойлгомжтой ээдрээтэй байдал ихээр үүсгээд байгаа юм.