Италид нэг өдрийн дотор 133 хүн Covid-19-өөр нас баржээ

Италид шинэ коронавирусийн халдвар авсан 20 хүн тутмын нэг нь нас барж байна. Гуравдугаар сарын 8-ны байдлаар халдварын улмаас нас барсан хүний тоо 366 болсон байна. Ингэснээр Италийн хувьд энэ өвчний нас баралт нь 4,96 хувь болсон.Өчигдрийн байдлаар нэг хоногийн дотор 133 хүн нас барсан тун таагүй мэдээ ирсэн.

 Нас баралтын тоогоор АНУ хоёрдугаар бичигдэж байна. Тэнд 19 хүн нас барсан нь нийт өвчлөлийн 4,03 хувь нь болж байгаа өндөр үзүүлэлт юм. Харин БНХАУ-ын эрх баригчид эрс шийдэмгий арга хэмжээ авч, иргэд нь туйлын сахилга баттай байгаа тул хамгийн олон тохиолдолд бүртгэгдсэн энэ улсад нас баралт 3,38 хувьтай, гуравдугаар бичигдэж байна. Иран дах нас баралт 2,96 хувь байгаа бол Өмнөд Солонгосынх 0,68 хувь байна.

Нэг сая хүнд ногдох халдвар авсан хүмүүсийн эзлэх хувиар Өмнөд Солонгос нэгдүгээр бичигдэж байна. Тэнд 1 сая хүнд 142,1 батлагдсан тохиолдол бүртгэгдсэн. Хоёрдугаарт Итали орж байна. Тэнд 1 сая хүнд батлагдсан 121,9 хүн ногдож байна. Гуравдугаарт 80,9 тохиолдолтой Иран орсон бол 58,3 тохиолдолтой Хятад дөрөвдүгээрт бичигдэж байна.

Ингэснээр 1 сая хүнд ногдох батлагдсан тохиолдол ба нас баралтын эзлэх хувиар Итали улс дах Covid-19-ийн байдал хамгийн хүнд байгаа юм. Иймд Италийн 14 мужийн орох ба гарах хөдөлгөөнийг дөрөвдүгээр сарын 3-н хүртэл хаасан байна. Эдгээр мужуудад бүх, сургууль, спортын заалнуудыг хааж, шашны бүх зан үйлийг хориглосон.