Грета Тунбергийг “цаг үеийн моод”, “хичээлээ хий” гэжээ

Улстөрчид, банк ба үйлдвэрийн эздийг дэлхийн цаг агаарын сүйтгэж залуу насыг нь хулгайлсан гэж дуулиан тарьж гарч ирсэн цаг агаарын өөрчлөлтийн эсрэг тууштай тэмцэгч Грета Тунберг Европын холбооны комиссын хуралдаанд оролцохоор урилгаар Брюссел хотноо ирсэн тухай “Euronews” мэдээлж байна.

Грета Тунберг хэдий сургуулийн сурагч, жаахан хүүхэд ч гэлээ олон нийтэд асар нөлөөтэй хүн тул Еврокомиссын удирдлагууд түүнийг хүлээн авч, уулзаж ярилцахад туйлын нухацтай хандсан гэж байна. Европы холбоо цаг агаарын өөрчлөлтийн талаарх шинэ хуулиа танилцуулах гэж байгаатай холбогдуулан түүнийг урьсан аж. Харин Грета Тунберг Европын холбооны энэ хуулийг хэт зөөлөн, үйлдвэрийн эздэд бууж өгсөн агуулгатай боллоо гэж зад шүүмжилжээ.

Тэрээр Twitter хуудсаараа Европын холбоо нь 2050 он гэхэд нүүрсхүчлийн хийн ялгарлыг саармагжуулж чадахгүй бол бууж өгсөн хэрэг болно гэж бичсэн. Ингэхдээ өөрийг нь дэмждэг хүмүүс энэ талаар яаралтай арга хэмжээ авах шаардлагатай тухай бичсэн захидлынхаа холбоосыг улстөрчдөд танилц гэж үлдээгээд байсан юм.

Гэвч Европарламентын гишүүд бүх зүйлсийг Гретагаас өөрөөс нь сонсохоор шийдсэн байна. Грета Хүрээлэн буй орчны хороонд үг хэлэхдээ Twitter-т бичсэнээ давтан ярьж, цаг агаарын сүйрэл ирэх боломжийн талаар хэн хийсэн нь мэдэгдэхгүй шинжлэх ухааны дүгнэлтээс иш татахаас хэтэрсэнгүй. Тэрээр “Цаг агаарын тухай та нарын хууль бол үг дуугүй бууж өгсөн хэрэг. Яагаад гэвэл байгаль дэлхий наймаалцдаггүй юм. Физиктэй тохиролцоонд хүрэх боломжгүй” гэжээ.

Ийм сургууль сонссон улстөрчид Грета Тунбергийг хүндлэн алга ташихаас хэтэрсэнгүй. Тэдний зарим нь Тунбергийн дэвшүүлсэн байгаль хамгаалах тухай поп үзэл санааг дэмжсэний ачаар Европын парламентад сонгогдсон тул хариуд нь элдэв зүйл ярихаас зайлсхийсэн гэдгийг “Euronews” сануулсан байна. Гэвч зарим нь Грета Тунбергт ахмад хүний ёсоор хатуу үг хэлжээ. Тэд Гретаг “цаг үеийн моода” төдий гээд “Сургуульдаа буцаж очоод, хэвийн амьдралаар амьдар. Хүүхэд нас чинь цаг агаар шиг үнэ цэнтэй тул цаашид ч энэ чигээрээ яваад байвал эргэл буцалтгүй алдана шүү” гэжээ.

Ийм хэдий ч Европ даяар олон  мянган охид хөвгүүд Гретаг дагахын тулд хичээлээ тасалж, лекцээ орхин явцгааж байна. Цаг агаарын өөрчлөлтийн эсрэг эрс шийдэмгий хууль батлахыг шаардсан ээлжит удаагийн жагсаал өнөөдөр Брюссель хотноо болох гэж байна.