Барагшун түүх нэрийдлээр эд өлгийн зүйлсийг хууль бусаар олж, худалдаалах гэж байжээ

Баян-өлгий аймгийн Цагдаагийн газарт ирүүлсэн мэдээллийн дагуу тус аймгийн иргэн “Б” нь Сагсай сумын 3 дугаар багийн нутаг дэвсгэрээс барагшун түүх нэрийдлээр суран хөвчтэй, эвэр нум нэг ширхэг, ясан болон төмөр зэвтэй долоон ширхэг сум, сумны модон ховд, модон тагш, арьсан дашмаг, ясан иштэй төмөр хутга зэрэг эд өлгийн зүйлсийг хууль бусаар олж аван улмаар худалдан борлуулах зорилготой хадгалж байсан үйлдлийг илрүүлэн холбогдох мөрдөн шалгах ажиллагааг явуулж байна. Мөрдөн шалгах ажиллагааны явцад хураан авсан эд өлгийн зүйлс нь МЭ X-XIII зуун буюу одоогоос 700-1000 жилийн өмнөх үед холбогдох ба “түүх соёлын хосгүй үнэт зүйл”-ийн зэрэглэлд хамаарах талаар Шинжлэх ухааны академийн Архелогийн хүрээлэнгээс дүгнэлт гаргажээ. Хадны оршуулгын дурсгал нь Монгол улсаас өөр улс оронд ховор тохиолддог бөгөөд хадны оршуулгын дурсгалаас илэрсэн ховор олдворууд нь судалгааны өндөр ач холбогдолтой байдгаас гадна гадаадын үзэсгэлэн,дэлхий олон нийтэд Монголчууд ямархуу уламжлалтай ард түмэн вэ гэх асуултад хариулах бодит баримт болохын зэрэгцээ Монголчуудын түүх соёлын судалгааг баяжуулахад чухал хувь нэмэртэй, шинжлэх ухааны онцгой ач холбогдолтой олдвор юм байна.