Коронавирус Европоор эрчимтэй тархаж байна

Коронавирус Европ тивээр маш хурдан тархаж байна. Тухайлбал, тун саяхныг хүртэл харьцангуй тайван байсан Францад 212 тохиолдолд бүртгэгдэж, 4 хүн нас барсан байна. Коронавирусийн тархалт газар авахыг дагаад амны хаалт, ариутгагч гелийн үнэ тэнгэрт хадаж байгаа аж. Францын Ерөнхийлөгч Эммануэль Макрон энэ талаар “Бид хэдэн долоо хоног, магадгүй сараар үргэлжлэх үе шат руу шилжээд байгаа тул нүүр тулгарсан тахлыг зогсоож, ялахын тулд эрүүл саруул сэтгэж, шийдэмгий бөгөөд хүлээцтэй байх хэрэгтэй” гэжээ.

ДЭМБ-ын мэдээлж буйгаар шинэ коронавирусийн улмаас үүссэн нас баралт 3,4 хувь байгаа аж. Харьцуулахад, жил болгон улирлын шинжтэй дэгдэж байдаг томууны улмаас халдвар авсан хүмүүсийн 1 хувь хүрэхгүй нь нас бардаг. Үүний дээр тусгайлан COVID-19-өөс эмчлэх эм, тариа байхгүй, амны хаалт хүртээмж муутай байгаа нь өвчин Европт газар авахад нөлөөлжээ.

Хятадаас гадна өвчний хамгийн том голомт болж хувираад байгаа Италид 2263 хүн халдвар авч, 79 нь нас бараад байна. Испанийн нутаг дээр коронавирусийн улмаас нас барсан анхны тохиолдол бүртгэгдсэн болж нийт халдвар авсан хүний тоо 150 болжээ.

Сүлийн нэг хоногийн дотор Хятадаас гадна коронавирусийн халдвар авсан 1792 хүн бүртгэгдсэн. Үүний дотор Саудын Арави, Тунис, Марокко, Иордани, Сенегал, Португал, Латви, Андорр зэрэг улсад анхын тохиолдлууд бүртгэгдсэнээр дэлхийн 73 оронд COVID-19 бүртгэгдээд байна.