Шартсан хүнийг Covid-19 туссан гэж андууран 14 хоног тусгаарлажээ

Сингапураас Лондоны чиглэлд онгоцоор зорчиж явсан эмэгтэй шартсан байсныг онгоцны үйлчлүүлэгч шинэ коронавирус тусаад халуурсан гэж сэжиглэн саатуулж, 14 хоног нууц газар тусгаарлуулсан тухай “Mirror” бичсэн байна.

Жулия Валентин гэдэг 26 настай британи оюутан эмэгтэй нисэхийн өмнөх орой найзын хамт Сингапурт согтууруулах ундаа уугаад бараг унтаагүй байсан аж. Нислэгийн үеэр шарталт эхэлж бие нь муудсан тул бүсгүй онгоцны үйлчлүүлэгчид хандан толгойн өвчин намдаах парацетамол өгөхийг хүсжээ. Гэтэл онгоцны үйлчлэгч нь Жулияг Сингапурт байхдаа коронавирус тусаж, халуурсан тул онгоцноос бууж шалгуулахын өмнө халуунаар буруулах гэж байна гэж хардсан байна.

Улмаар хөөрхий Жулияг хүчээр шахуу амны хаалт өмсгөөд, онгоцны бусад зорчигчдоос тусгаарлаж, халууныг нь хагас цаг тутам үзсээр Лондонд буужээ. Лондонд буумагц тусгай хамгаалалтын хувцас өмссөн эмч нар болон гал унтраагчид угтан авч үзлэг хийн саатуулаад нууц газар 14 хоног албадан тусгаарласан байна. Бүсгүй өөрийг нь яг хаана тусгаарлаж байсныг сайн мэдэхгүй байгаа ч нисэх буудлаас холгүй “Holiday Inn” зочид буудлын байр байсан гэж таамаглаж байгаа гэжээ.

Жулия нь өөрийгөө шартсан төдий, өвдөөгүй гэж эмч болон онгоцны үйлчлүүлэгч нарт итгүүлэх гэж ятгаж үзсэн ч “Ятгах тусам нягтал” гэдэг зарчим үйлчилж улам л хардаж, үл итгэх байдал гаргаж байсан тухай сэтгүүлчдэд ярьжээ.