Covid-19-ийн шинэ тохиолдол Хятадад 125, Өмнөд Солонгост 500 бүртгэгджээ

Өнгөрсөн өдрийн дотор БНХАУ-д коронавирусийн халдвар авсан батлагдсан 125 тохиолдол бүртгэгдсэн тухай “Синьхуа” агентлаг мэдээлсэн бол Өмнөд Солоност аймшигт өвчний батлагдсан шинэ тохиолдолд 477, бараг 500 хүрсэн тухай “Yohnhap” агентлаг мэдээлсэн байна.

Хятад улсын хэмжээнд 2742 хүн эдгэрч эмнэлгээс гарсан бол хүнд явц бүхий хүний тоо 304-өөр буурчээ. Ингэснээр БНХАУ-ын эх газрын хэсэг дэх халдвар авсан хүний тоо 80 мянга 151 болсон байна.

Харин Өмнөд Солонгост шинээр 477 хүн халдвар авснаар нийт халдвар авсан хүний тоо 4812 болсон байна. Эдний 75 хувь Дэгү хотод бүртгэгджээ. Дэгү хотыг аюулт өвчний голомт болж хувирахад гол үүрэг гүйцэтгэсэн гэх “Шинчонжи” шашны урсгалын 12 удирдагчийг Сөүл хотын захиргаанаас шүүхэд өгч байгаа тухай  “ВВС” мэдээлсэн байна. Тэднийг хүн амины хэрэг, санаатайгаар хохирол учруулсан, халдвар өвчний хяналтын тухай хуулийг зөрчсөн гэж буруутгаж байгаа аж.

Өмнөд Солонгосын эрх баригчид тус шашны урсгалыг дагагч 230 мянган хүнд бүгдэд нь коронавирусийн шинжилгээ хийж чадсан байна. Ингэхэд 9 мянган хүнээс нь аюулт өвчний шинж тэмдэг илэрсэн аж.

Өвчнийг тархах гол нөхцөл болж өгсөн “Шинчонжи” урсгалыг 1984 онд Өмнөд Солонгосын номлогч Ли Ман Хи үүсгэн байгуулжээ. Ли нь өөрийгөө Христийг дараа дэлхий дээр ирэх эцэг тэнгэрийг хүү, “Библь” судраас зөгнөсөн “сайн  хоньчин” гэж нэрлэсэн /хонь нь хэн болохыг тайлбарлах хэрэггүй биз/. Шинчонжчи гэдэг нь шинэ Тэнгэр ба шинэ Дэлхийн гэсэн утгатай юм байна. Ли Ман Хи нь Библь судрыг зөвхөн өөрөө болон өөрийг нь дагасан хүмүүс ойлгож чадах далд бэлгэдлийг хэллэгээр бичсэн гэж номлодог. Анхандаа энэ урсгал зөвхөн Өмнөд Солонгос байсан ч яваандаа хил даван тархаж эхэлсэн. Христийн бусад урсгалынхан “Шинчонжи”-г нэг хүнийг тахин шүтэх үзэл дээр үндэслэсэн гэж шүүмжилж, өвчин тараасан хэргийн буруутан болохоос бүр өмнө олон тооны эсэргүүцэлтэй тулгарч эхэлж байжээ.