Өмнөд Солонгост коронавирусийн халдвар авсан хүний тоо 1595 хүрэв

Өмнөд Солонгост хоёрдугаар сарын 27-ны байдлаар 334 тохиолдол шинээр бүртгэгдсэн тухай “Yonhap” агентлаг мэдээлсэн байна. Ингэснээр тус улсын хэмжээнд нийт халдварын тоо 1595 болсон байна.

Өмнөд Солонгосын удирдлагууд шинэ коронавирусийн халдварыг гол тараагч болох Христийн шашны жижиг урсгалыг дагагч бүх хүний шалгахаар болсон байна. “Синчхонжи” нэртэй энэхүү жижиг урсгал нь 200 мянга орчим дагагчтай аж.

Хоёрдугаар сарын 18-нд Өмнөд Солонгос дах Covid-19-ийн тохиолдол 30 хүрэхгүй цөөн байсан. Гэтэл “Синчхонжи” урсгалыг дагагч 61 настай эмэгтэй халдвар авсан байж болох шинж тэмдэг байсаар атал Хятад руу яваагүй, хятад иргэдтэй харилцаагүй гэсэн шалтгаар шинжилгээ өгөхөөс татгалзаж яваад хожим коронавирустэй нь тогтоогдож Өмнөд Солонгосын 31 дэх тохиолдол болж байсан. Гэтэл тэрээр коронавирусийн халдвар авсан нь тогтоогдох хүртэл шашны шугамаар олон зуун хүнтэй уулзаж, хамт мөргөл хийгээд амжсан байсан нь халдвар эрчимтэй тархах гол нөхцөл болсон байна. Ингээд 10 хоногийн дараа гэхэд халдвар авсан хүний тоо ийнхүү 31-ээс 1595 болтол огцом өсжээ.

Одоо шашны энэ урсгалыг хаах талаар яригдаж эхэлсэн байна.