Ираны ЭМ-ийн орлогч сайд коронавирусийн халдвар авчээ

Хятад дах Covid-19-ийн халдварын тоо огцом өсөлтөө зогсоож, тогтворжих тийшээ чиглэсэн бол Өмнөд Солонгос, Италийн хойд нутаг, Иран гэсэн улсуудад эсрэгээрээ халдвар ба халдвараас болж нас барагчдын тоо эрчимтэй нэмэгдэж эхэлжээ.

Тухайлбал, Иран улсад Эрүүл мэндийн орлогч сайд нь хүртэл Covid-19-ийн халдвар авсан байна. Ираны Эрүүл мэндийн орлогч сайд даваа гарагт хэвлэлийн баг хурал хийж, эрх баригчид халдварын талаарх бодит мэдээллийг нуугаагүй гэж хэлж байхдаа хөлсөө арчин, ханиалгаж байгаа нь хүмүүсийн анхаарлыг ихэд татсан. Гэтэл тэрээр өнөөдөр Covid-19-ийн халдвар авсан гэдгээ мэдэгдэн, нийгмээс өөрийгөө тусгаарлан эмчилгээ хийж эхэлсэн тухай видео бичлэгийг тараасан байна. Иранд албан ёсны мэдээгээр халдвар авсан хүний тоо 95, халдвараас болж нас барсан хүн 15 болоод байгаа юм. Америкийн удирдлага заналт дайсан гэж зарласан улсаа ийм үед ч тайван байлгахыг хүссэнгүй Төрийн нарийн бичгийн дарга Майк Помпео нь Ираныг шинэ коронавирусийн тахлын талаар үнэн бодит мэдээллийг нууж байж болзошгүй гэж сэтгэл түгшиж буйгаа илэрхийлээд дэлхийн бусад улс орнуудыг энэ өвчнийг талаарх бүх үнэнийг дэлгэхийг уриалаад авсан тухай BBC мэдээлсэн байна.

 Иран дах халдвар авсан хүний тоо Хятадынхтай зүйрлэхээргүй цөөн байгаа ч исламын шашны шиит урсгалыг дагагчдын ариун шүтээн тус улсад байдаг, түүнд мөргөхөөр жил болгон олон зуун мянган хүн ирж очдог тул ДЭМБ ихээхэн сэтгэл зовниж байгаа аж. Тэгээд ч Иран дах Covid-19-ийн голомт болсон хотууд нь Кума, Мешхед гэсэн шиитүүдийн ариун шүтээн болоод байгаа нь ингэж сэтгэл зовних бодит үндэслэл байгааг харуулж байгаа юм. Улмаар Иран орж ариун газар мөргөл хийгээд ирсэн хүмүүс хөрш зэргэлдээ орнуудад халдвар тараасан тохиолдлууд бүртгэгдсээр байна. Тухайлбал, Афганистан, Бахрейн, Ирак, Кувейт, Оман зэрэг улсуудад илэрсэн Covid-19-ийн бүх тохиолдол нь Иран орж, ариун шүтээнд мөргөл үйлдээд ирсэн сүсэгтэн хүмүүс байж.

Ариун шүтээн болон түүнийг түшиглэн байгуулсан шашны сургуулиудыг хаахгүй гэдгээ нутгийн шашны удирдлагууд мэдэгдсэн байна. Өөрөөр хэлбэл шашин номын ажлыг хэнээр ч заалгахгүй, сүсэгтнүүд өөрсдөө мэдэх хэрэг гэсэн байна. Иймд хөрш зэргэлдээ орнууд нь ариун шүтээнүүдийг түр хугацаагаар хаахыг маш хатуу шаардаж эхлэхээс нааш хаахгүй юм байна.