БНСУ ирэх 10 хоног вирусын тархалтыг “барих үе” хэмээж байна

Өчигдөр буюу 23-ны өдөр БНСУ-ын Засгийн Газар гамшгийн зэрэглэлийн дээд түвшин болох "онц ноцтой" түвшинд зарлаж тус улсын Ерөнхий сайд нь Гамшгийн аюулгүй байдлын төв газрыг ахлахаар болсон юм. Гамшгийн аюулгүй байдлын төв газрын 1-р орлогч буюу Эрүүл мэнд, халамжийн сайд Пак Нын Хү мэдэгдэхдээ "Цаашид нэг долоо хоногоос 10 хоногийн дотор корона19-ийн тархалтыг барьж авах оргил үе нь байх болно" гэж мэдэгдлээ. Халдварт өвчний мэргэжилтнүүдийн үзэж байгаагаар энэ 7 хоногт корона19-ийн тархалтыг барьж авах "Golden time" буюу хамгийн чухал цаг үе болно гэж үзэж байна. Засгийн газрын хувьд халдварт өвчтөнүүдийг эрт илрүүлэх болон эмчилгээнд хамруулах ажил нь хамгийн чухал ажлын нэг болж байна. Эрүүл мэндийн яамнаас корона19-ийн тархалтыг зогсоохын тулд ард түмний урьдчилан сэргийлэх арга хэмжээ чухлыг онцолсон байна. Хамгийн чухал нь гараа 30 секундээс дээш хугацаанд савандаж угаах, нүүр болон биеийн бусад хэсэгтээ гараар хүрэхгүй байх явдал юм. Гадагшаа гарах тохиолдолд маск заавал зүүх шаардлагатай ба ханиах үедээ амаа заавал ханцуйгаараа таглах хэрэгтэйг сануулж байна. Мөн олон хүн цугларсан газарт очихгүй байх хэрэгтэй.

Эх сурвалж: Ц.Өнөрзаяа Күүкмин Их Сургуулийн багш