Зургаан сартай хүүхэд цэнэглэж байсан утаснаас цахилгаанд цохиулж сэхээнд оржээ

Бразилд зургаан сартай охин цэнэглэж байсан утсыг хазаад цахилгаанд цохиулж, амиа алдахаа дөхсөн тухай “Daily Mail” бичсэн байна.

Энэ хэрэг хоёрдугаар сарын 18-нд Бразилийн Мату-Гросу мужийн Лукас-ду-Риу-Верди хотод гарсан гэж байна. Хүүхэд цэнэглэгч залгасан утсаар тоглож байгаад амандаа хийж, зөөлөн хазсан байна. Тэр даруй богино холбоо үүсэж байшингийн цахилгааны хамгаалах самбарын автомат гал хамгаалагч ажилласан ч охин цахилгаанд цохиулан ухаан алджээ.

Эцэг, эх нь хүүхдийг ойролцоог эмнэлэгт хүргэх үед гар, нүүр нь хүчтэй түлэгдсэн байсан бөгөөд шууд сэхээн амьдруулах тасагт, эрчимт эмчилгээнд орсон байна. Ухаангүй байх үед нь амьсгалын замыг нь шүлс таглан бүтэж үхэх аюултай байсан тул эмч нар тусгай төхөөрөмжөөр соруулж авсан аж. Охин одоо эрчимт эмчилгээнд байгаа бөгөөд гар, нүүрнийхээ түлэгдэлтийг эмчлүүлж байгаа юм байна. Эмч нар эцэг, эхчүүдэд хандан цаашид ийм хэрэг гарахаас сэргийлэх үүднээс утсаа цэнэглэж байхдаа анхааралтай байхыг уриалжээ.