Казахстан “Сибирийн хүч-2” дамжуулах хоолойг Монголооор биш өөрийн нутгаар дайруулах ашигтай санал тавина

Казахстан улс Оросын шатдаг хийг БНХАУ-д хүргэх “Сибирийн хүч-2” дамжуулах хоолойг өөрийн нутгаар дамжуулах сонирхолтой байгаа тул илүү ашигтай санал тавьж ОХУ-тай хэлэлцээ хийж байгаа тухай тус улсын Эрчим хүчний сайд Нурлан Ногаев хоёрдугаар сарын 18-нд сэтгүүлчидтэй уулзахдаа мэдэгджээ.

Тэрээр өмнө нь ОХУ-ын Эрчим хүчний сайд Александр Новактай уулзах үеэр анх энэ саналыг тавьсан байна. Харин энэ удаад ярихдаа Казахстаны нутгаар дайруулан тавих хоолойн дэлгэрэнгүй төлөвлөгөөг хараахан гаргаагүй байгаа, зөвхөн тийм боломжийн талаар яригдаж байгаа гэдгийг онцолжээ.

Хэрэв энэхүү хий дамжуулах хоолойг Казахстаны нутгаар дайруулбал Хятадын “Өрнөд-Дорнод” гэсэн хий дамжуулах системд очиж холбогдох боломжтой юм байна. Харин Казахстаны хувьд энэхүү нүсэр төслийг өөрийн нутгаа дамжуулах болгосноор Зүүн Казахстан ба Павлодар гэсэн хязгаарын иргэдээ шатдаг хийгээр хангах бодолтой байгаа аж.

Казахстаны тавьсан саналыг Оросын эрчим хүчний сайд анхааралдаа авсан бөгөөд энэ талаарх хэлэлцээг үргэлжлүүлэн хийхээр болсон байна.

Шатдаг хий нийлүүлэгч ОХУ ба хүлээн авагч БНХАУ хоёр нь үүнээс өмнө нь “Сибирийн хүч-2” хоолойг Монгол  улсын нутгаар дамжуулан тавихтай холбоотой судалгааг хийж байгаа юм. ОХУ-ын талын мэдэгдсэнээр дамжуулах хоолойг Монголын нутгаар дайруулах саналыг Хятадын тал гаргасан аж.