Г.Батхүү агсны гэрийнхэнг бичлэгээр залилсан этгээд нь цагдаагийн хурандаагийн хүү байжээ

Б.Батхүү агсныг Төрийн ордонд амиа алдсанаас хойш "надад хэргийн эзний бичлэг байна, намайг эхнэр хүүхэдтэй минь гадагшаа гаргаж өг, тэгвэл би хэргийг илчлэх баримт болох бичлэгийг өгнө" хэмээн талийгаачийн ар гэрийнхэнтэй нууц хаягнаас хэд хэдэн газраас зэрэг холбогджээ. Тэрбээр өөрийгөө сэтгүүлч гэж нэрлэсэн бөгөөд Г.Батхүү агсныг шатнаас түлхэж буй 13 секундийн бичлэг өөрт нь байгаа тухай мэдээлсэн байна. Энэ дагуу талийгаачийн ар гэрийнхэн бичлэгийг 15 сая төгрөгөөр худалдан авч  гэмт этгээдэд залилуулжээ.

Хууль хяналтын байгууллага үүнийг нь мөрдөн шалгаж эхэлсэн. Талийгаач Б-гийн ар гэрийнхэнд бичлэг аваачиж өгсөн Г гэдэг нь мөрдөн байцаалтын явцад хуурамч бичлэг гэдгийг хүлээн зөвшөөрсөн байдаг. Бүр хэн хэнтэй нийлж бичлэг хийсэн бэ гэдгийг тогтоосон байгаа. Өөрөөр хэлбэл, талийгаачийн ар гэрийнхнээс 15 сая төгрөг залилан авсан нь тодорхой болсон. Дээрх хэрэг шалгагдаж байгаа” гэж ЦЕГ-аас мэдээлсэн юм. Бидний олж авсан баттай эх сурвалжийн мэдээллээр Г.Батхүү агсны  ар гэрийнхэнд бичлэг аваачиж өгсөн хүн нь Б.Ганзориг. Түүний аав нь Дорнод аймгийн харьяат Цагдаагийн ерөнхий газрын тэргүүн дэд даргаар ажиллаж байсан хурандаа Д.Базаргүр юм байна. Б.Ганзоригийг бусдыг хуурч, мэхэлж залилсан гэх үндэслэлээр Сүхбаатар дүүргийн цагдаагийн хэлтэст эрүүгийн хэрэг үүсгэн шалгаж байгаа бөгөөд тэрбээр удаа дараа залилангийн хэрэгт холбогдон шалгагдсан нэгэн ажээ.