Хагалгаа хийж илүүдэл хөхийг нь тайрч авчээ

Английн Хартфордшир гүнлэгийн Хитчин хотод амьдардаг эмэгтэйд эмч нар тун өвөрмөц хагалгаа хийсэн тухай “The Mirror” сонин бичсэн байна.

Фиби Эллис гэгч 22 настай бүсгүйг 12 настай байхад нь  суганы дотор талд нь теннисний бөмбөгийн дайтай ургацаг гарчээ. Үүнээс гурван жилийн дараа баруун суганд нь яг адил ургацаг үүссэн байна. Эллисийн биеийн юм ирэх тоолон хоёр ургацаг нь өвддөг байж. Энэ талаар эмч нарт хэд хэдэн удаа үзүүлж байсан ч нарийн шинжилгээ хийдэггүй байж. Эрүүл мэндийн даатгалаар үнэгүй хагалгаа хийлгэж ургацгаа авхуулъя гэхээр гоо сайхны хагалгаа гээд төлбөр нэхдэг.

Үүнээс болоод Эллис биеэ бусдаас нууж хаах, усанд сэлэх, наранд шарах гэх мэт зүйлсээс зайлсхийдэг, үргэлж, халхгар том хувцас өмсдөг, эрэгтэйчүүдтэй уулзахаас эмээдэг зэрэг сэтгэл санааны хувьд тун хүнд байдалд орсон байна. Иймд эцэг, эх нь гоо сайхны хагалгааны мөнгө цуглуулж, тус болохоор шийджээ. Хангалттай мөнгө цуглуулсны дараа эмчид хандан нарийвчилсан үзлэг хийлгэтэл Эллисийн хоёр суганд нь сүүн булчирхайн илүүдэл эд үссэн гэсэн онош тавьсан. Мөн Эллис цор ганцаар ийм эмгэгтэй биш гэдгийг тайлбарлаж өгчээ. Эмэгтэйчүүдийн 2-6 хувьд нь илүүдэл сүү булчирхай, хөх үүсэх явдал ажиглагддаг, зарим тохиолдолд илүүдэл булчирхай нь хөхний товчтой ч байдаг аж.

Эллисийн илүүдэл сүүн булчирхайг авсны дараа том сорви үлдсэн ч тэрээр баяртай байгаа гэж байна. Өөртэй нь адил асуудалтай тулгарсан эмэгтэйчүүдэд туслах үүднээс “The Mirror” сонинд хандаж түүхээ хуваалцахаар шийдсэн гэж.