Ихрийн өрөөснөө аврахын тулд 27 кг турж, өрөөсөн бөөрөө өгчээ

Америкийн Охклахома мужийн Талс хотод амьдардаг Жеймс Ингли гэгч 26 настай залуу ихрийн өрөөснөө аврахын тулд 27 турж, өрөөсөн бөөрөө өгсөн тухай “Unilad” мэдээлжээ.

Жеймсийн ихэр Далтон нь 2016 онд бөөрний түүдгэнцэрийн үрэвсэл гэсэн эмгэгтэй болсон. 2018 онд уушгины хатгааны үеэр хүндрэл өгч байнга хиймэл бөөрний аппарат хэрэглэх ёстой болсон байна. Яваандаа бөөр шилжүүлэн суулгалгүйгээр удаан явахгүй гэдгийг эмч нар Далтонд анхааруулсан байжээ. Өөрт 100 хувь тохирох бөөрний донор олно гэдэг тул амаргүй зүйл. Харин Далтоны хувьд ихрийн өрөөсөн Жеймс Ингли нь өрөөсөн бөөрөө шилжүүлэн өгч донор болохоор шийдэж. Гэтэл үзлэгийн явцад Жеймсийн амьдралын хэв маяг, биеийн онцлогоос болоод бөөр шилжүүлэн суулгах хараахан боломжгүй гэсэн дүгнэлт гарчээ. Иймд ихэртээ бөөрөө өгөхийн тулд Жеймс Ингли нь амьдралын хэв маягаа бүрэн өөрчлөх хэрэгтэй болсон байна. Эрүүл хоол хүнс хэрэглэж, ачааллаа тохируулж, өдөр болгон биеийн тамирын дасгал хийж, эрт унтаж тусгай дэглэм баримталсны эцэст 27 кг турсны дараа эмч нар бөөрийг нь шилжүүлэн суулгахад тохиромжтой гэж үзсэн байна. Хагалгаа амжилттай болж Далтон Ингли нь удахгүй ажилдаа орох гэж байгаа аж.