Хойд Солонгос 2019 онд НҮБ-ын хориг үл тоон цөмийн болон пуужингийн хөтөлбөрөө хөгжүүлсээр байна

Хойд Солонгос нь 2019 онд НҮБ-ээс авсан хоригийн дагуу цөмийн болон пуужингийн хөтөлбөрүүдээ зогсоохын оронд үргэлжлүүлэн хөгжүүлж байсан тухай НҮБ-ийн Аюулгүйн зөвлөлийн Хойд Солонгосын эсрэг хориг арга хэмжээний хорооны илтгэлд дурдсан байсныг “Reuters” агентлаг уламжилжээ.

“Reuters” агентлаг нь НҮБ-ын Аюулгүйн зөвлөлд зориулан бэлдээд дараа сараас олон нийтэд ил болгох байсан Хойд Солонгосын эсрэг хориг арга хэмжээний талаарх тайланг олж авснаар зарим сонирхолтой баримтуудыг дэлгэсэн нь энэ аж.

Тухайлбал, 2019 оны туршид Хойд Солонгос нь пуужингийн 13 туршилт хийж, 25 пуужин харвасан. Түүнчлэн Хойд Солонгосын хакерууд нь дэлхий даяар биткойны биржүүд рүү дайралт хийж, их хэмжээний мөнгө хулгайлсан байна. Мөн Хятадын чиргүүл усан онгоц ашиглан 370 сая долларын нүүрс экспортолж, их хэмжээний шатахуун импортлон оруулсан гэж байна.

2017 онд Хойд Солонгосыг цөмийн болон пуужингийн туршилт явуулсны хариуд НҮБ-ын Аюулгүйн зөвлөлөөс тус улсын эсрэг маш хатуу хориг арга хэмжээ авсан. Энэ хориг ёсоор Хойд Солонгосоос нүүрс, төмрийн хүдэр, хар тугалга, далай гаралтай бүтээгдэхүүн гээд бүх төрлийн эрдэс болон биологийн гаралтай бүтээгдэхүүн экспортлохыг хориглосон. Мөн дэлхий даяар Хойд Солонгосын ажилчдыг хөлслөн ажиллуулахыг хориглосон. Гэвч Хойд Солонгос нь энэ бүх хоригийг амжилттай тойрон гарч чадаж байгаа  нь энэ илтгэлээс харагдаж байна.

2019 оны сүүлээр ОХУ ба БНХАУ  хоёр нь Хойд Солонгос дах хүмүүнлэгийн нөхцөл байдлыг сайжруулах үүднээс хориг арга хэмжээг зөөлрүүлэхийг НҮБ-ын Аюулгүйн зөвлөлд уриалсан.