Д.Сарангэрэл: Халдвар гарсан тохиолдолд 800 ор бэлэн байна

Эрүүл мэндийн сайд Д.Сарангэрэл Улсын Онцгой комиссын хуралд мэдээлэл хийлээ.

ДЭМБ-аас нэгдүгээр сарын 3-ны өдөр МУ-д коронавирусын талаар анх мэдээлэл өгсөн.

Манай улстай хиллэдэг Хятад улсын 31 мужид вирус илэрлээ. Эрээн хот нэгдүгээр байдлын онц дэглэмтэй байгаагаа өчигдөр мэдэгдсэн. Эрсдэл улам өндөр болж байна. Эрүүл мэндийн салбар хоёр чиглэлээр ажиллаж байна.

1. Халдвараас урьдчилан сэргийлэх
2. Халдвар илэрсэн тохиолдолд авах арга хэмжээ

Өнөөдрийн байдлаар дэлхийн 54 оронд вирус илэрсэн. Бидний хувьд 132 сэжигтэй, нэгдүгээр хавьтлын тохиолдлыг шинжилсэн. Бүгд онош сөрөг гарсан.

ХӨСҮТ-д Уханиас ирсэн 31 оюутан, тэдэнд үйлчилсэн эмч сувилагч, онгоцны багийнхан тусгаарлагдсан хэвээр байна.

Вирусын халдвар гэр бүлийн хүрээнд гарч, түүнээсээ найз нөхөд, хамт олны хүрээнд халдварлаж байна. Мөн тухайн хүнд халдвар илрээгүй ч бусдад халдвар нь тархаж байгаа тохиолдол Сингапурт гарсан. Энэ бүхнээс эрсдэл их байгаа нь харагдаж байна.

Халдвар гарсан үед бэлэн байдлыг хангах чиглэлд түлхүү анхаарч ажиллаж байна. Мянга гаруй рецедент эмч нараа сургалаа. Энэ өвчний өрнөл маш хурдан байгаа тул анхан шатны эмч нараа сургаж байна.  

ДЭМБ-аас оношлуурыг хараахан баталгаажуулаагүй байгаа. Гэхдээ Японы оношлуурыг хүлээн зөвшөөрсөн. Манай улс эхний 200 оношлуураа авсан, хараахан дуусаагүй байна. Маргааш 500 оношлуур ирнэ. Цаашид 3000 оношлуур авна.

4.2 тэрбум төгрөгий шийдэж өгсөн. Энэ хүрээнд 100 мянган хувийн хамгаалах хэрэгслийг авч чадлаа. Мөн ариутгалын бодис, эм тарианы хүрэлцээний нөөцийг нэг сараар нь бэлдэж чадлаа. Азийн хөгжлийн банкны 4.2 тэрбум төгрөгийн тусламж үзүүлэхээр болсон, Энэ мөнгөөр аппарат хэрэгсэл тоног төхөөрөмжүүд авахаар жагсаалт гаргасан. Эхнээс нь худалдан авалт хийгээд явж байна. Хоёрдугаар сарын 25 гэхэд бүх худалдан авалт хийгдэж, шаардлагатай хэрэгслээр хангагдана.

Хэрэв халдвар гарвал Сэргээн засах клиникийг тусгаалан гаргахаар, Асралт мед эмнэлгийг ямар нэг түрээсгүйгээр санал болгож байна. . Мөн ХӨСҮТ-өө 200 ортойгоор ашиглана. Ингээд үзэхээр 800 орны асуудлыг шийдэж чадсан байна.

Мөн хотын захад эмнэлэг гаргах шаардлагатай гэж үзэж, эхний ээлжид ярилцсан. Жаргалантын аманд байдаг 12 ортой сувиллыг мөн энэ тусламжийн чиглэлээр гарган ажиллах боломжтойг ярьсан.