Жанжны дөч, маршалын зээ охин эдийн засгийн тусгаар тогтнолыг санууллаа

Чойбалсангийн Халиун:

Та маршал Чойбалсангийн зээ охины хувьд өнөө үед өвөөгийнхөө үйл хэргийг хэрхэн үргэлжлүүлэх ёстой гэж боддог вэ?

Би бол маршал Чойбалсангийн охин Сувдын охин. Миний өвөө болон түүний хамтран зүтгэгчид Монгол Улсыг тусгаар тогтнуулах, цаашлаад нийт Монгол туургатныг нэгтгэж, нэгдсэн Монгол байгуулахыг зорьж байсан. Миний хувьд өнөө үед Монгол туургатны хэл соёлыг хадгалах, дэлгэрүүлэх, соёлын болон эдийн засгийн тусгаар тогтнолыг бэхжүүлэх нь бидний үеийнхний үүрэг гэж боддог.

Сүх-Эрдэний Өлзий:

Та өвөг дээдсийнхээ тухай ярихгүй юу?

Сүхбаатар жанжин Галсан гэдэг хүүтэй байсан, Галсангийн охин Наран, Нарангийн хүү Сүх-Эрдэнэ, Сүх-Эрдэний хүү нь миний бие.

Залуу хүний хувьд өвөг дээдсийнхээ үйл хэрэг, зорилгыг хэрхэн залгамжлан үргэлжлүүлнэ гэж боддог вэ?

ХХ зуунд миний өвөө Сүхбаатар үеийн нөхөдтэйгээ сэтгэл зүтгэл нийлж, тусгаар тогтнолын төлөө хувьсгалыг сэдэж, ялалт байгуулсан. Өнөө үед залуус өндөр боловсролтой болж байгаа нь сайн хэрэг. Гэхдээ үндэсний түүх соёл, эх оронч үзлээ сайтар судалж, сургамж авах нь үндэсний сэхээтний үүрэг болов уу. Тэгж гэмээнэ нэг улсаас эдийн засгийн хэт хамаарлаа багасгаж, эх орноо хөгжүүлж, тусгаар тогтнолоо бэхжүүлнэ гэж би боддог.