ХӨСҮТ: Коронавирусын сэжигтэй тохиолдлын хариу бүгд сөрөг гарсан

Шинэ коронавирусийн халдварын нөхцөл байдлын талаар өнөөдөр /2020.02.08/ Эрүүл мэндийн яамнаасмэдээлэл хийлээ. Вирустэй холбоотой Эрүүл мэндийн байгууллагууд өндөржүүлсэн байдалд ажиллаж байгаа юм.

ДЭМБ-ын Халдварт өвчин хариуцсан мэргэжилтэн О.Ариунтуяа “2020 оны хоёрдугаар сарын 8-ны өдрийн 08:00 цагийн байдлаар ДЭМБ-аас авсан мэдээллээр шинэ коронавирусийн 34722 хүрч, 722 хүн нас барлаа. Сүүлийн хоёр хоногт бага зэрэг буурсан. БНХАУ-аас гадна дэлхийн 24 улсад коронавирусийн халдвар бүртгэгдсэн. Шинээр халдвар авсан улс бүртгэгдээгүй. Үүнээс гадна Япон улсад тусгаарлагдаад буй усан онгоцны 3700 зорчигчдоос 64 хүн халдвар авсан.

БНХАУ-ын иргэдийн шинэ коронавирусаар халдварласан хүмүүсийн өвчлөлийн хувьд 92 хувь нь хөнгөн, 15 хувь нь хүнд, гурван хувь маш хүнд байна. Өндөр настай болон архаг суурь өвчтэй хүмүүсийн хувьд өвчлөл хүндрэх шинжтэй байна.

ДЭМБ-аас Эдийн засгийн форумтай хамтран нэгдүгээр сарын 25-нд хувийн хамгаалах хэрэгслийн зах зээлийн эрэлт, нийлүүлэлтийн судалгааг хийсэн. Тархалт багатай улс орныг хувийн хамгаалах хэрэгслийг нөөцлөхгүй байхыг зөвлөсөн” гэв.

ХӨСҮТ-ийн захирал Д.Нямхүү “2020 оны хоёрдугаар сарын 6-нд тусгаарлагдсан есөн тохиолдлын шинжилгээний хариу бүгд сөрөг гарсан. ХӨСҮТ-д тусгаарлагдсан сэжигтэй зургаан тохиолдол байсан. Сөүл-Улаанбаатар чиглэлийн онгоцоор ирсэн 1, Бээжин-Улаанбаатар чиглэлийн онгоцоор ирсэн 3, өмнө нь ирсэн 2 тохиолдол байсан. Мөн Дархан-Уул аймаг болон Ховд аймагт тусгаарлагдсан сэжигтэй тохиолдлуудын шинжилгээний хариу сөрөг гарсан. Хоёрдугаар сарын 7-ны өдөр сэжигтэй тохиолдол бүртгэгдээгүй” гэв.