Японд коронавирусийн 41 шинэ тохиолдол бүртгэгджээ

Японы Йокогама хотын боомтод тусгаарлагдаад байгаа 3500 зорчигч бүхий аяллын тансаг зэрэглэлийн усан онгоц “Diamond Princess”-оос  коронавирусийн  шинэ тохиолдол илэрсэн тухай тус улсын Эрүүл мэнд, хөдөлмөр ба нийгмийн баялгийн яамнаас мэдээлсэн байна.

Тус усан онгоцны зорчигчдоос авсан 41 шинжилгээ эерэг гарч, коронавирусийн халдвар авсан нь нотлогдсон байна. Ингэснээр Япон улс дах коронавирусийн халдвар авсан нийт хүний тоо 61 болж нэмэгджээ. Удахгүй Олимпын зуны тоглолт явагдах гэж байгаа Японы хувьд энэ бол тун таагүй мэдээ. Иймд Японы эрх баригчид тус усан онгоцыг тусгаарлах, халдварыг тархахаас сэргийлэх ба өвдсөн хүмүүсийг эмчлэхэд онцгой анхаарч байгаа юм.

“Diamond Princess” усан онгоцноос Хонконгд бууж үлдсэн нэг зорчигчоос коронавирус илэрсний дараа Йокогамад ирэхэд нь нэг ч хүн буулгалгүйгээр хөл хорио тогтоон, усан онгоцыг бүхэлд нь тусгаарласан. Удалгүй тус усан онгоцон дээр зорчиж явсан 10 хүнээс коронавирус илрээд байсан юм. Одоогоор тус усан онгоц дээр 2666 зорчигч, багийн гишүүн 1045 хүн байгаа юм байна.

Усан онгоцыг тусгаарласнаас гадна усан онгоцон дотор хөл хорио тогтоосон тул зорчигчид тус тусын тасалгааг орхин гарч чадахгүй тэндээ түгжигдээд байгаа аж.