Гэр бүл цуцлуулахдаа эхнэртээ мөнгө үлдээхгүйн тулд 1 сая доллар шатаажээ

Канадын Оттава хотод амьдардаг бизнес эрхлэгч салсан эхнэртээ мөнгө үлдээхгүйн тулд сая доллар шатаагаад 30 хоног хорих ял авсан тухай “Ottawa Citizen” бичсэн байна.

Брюс МакКонвиль гэгч 55 настай бизнесмен эр гэр бүл цуцлуулах хуралдааны үеэр санхүүгийнхээ тайланг шүүхэд өгөхөөс татгалзсан аж. Гэр бүлээ цуцлуулж, хуулийн дагуу эхнэртээ ихээхэн хэмжээний хөрөнгө мөнгө үлдээхээс өөр аргагүй болно гэдгээ мэдмэгц бүх өмч, хөрөнгө ба бизнесээ нууцаар заржээ. Ингээд зогсохгүй зарсныхаа дараа данснаасаа 1 сая гаруй канад доллар бэлнээр авч шатаасан гэж шүүхэд мэдэгдсэн байна.

Гэхдээ мөнгийг гэрчгүйгээр, ямар нэг бичлэг хийгээгүй тул үнэхээр шатаасан эсэхийг тогтоох аргагүй байдалд оржээ. Улмаар санхүүгийн ямар нэг тайлан өгөөгүй тул шүүхээс эхнэрт нь ногдох ёстой хөрөнгийн хэмжээг тогтоож чадаагүй байна. Гэсэн хэдий ч шүүгч нь түүнийг шүүхийг үл хүндэлсэн, хүүхдүүдийнхээ ирээдүйд анхаарал тавиагүй хэрэгт буруутай гэж үзэн 30 хоног баривчлах ял ногдуулж. Мөн санхүүгийнхээ тайланг шүүхэд гаргаж өгөх хүртлээ өдөр болгон 2000 канад долларын торгуулийг экс эхнэртээ төлж байх шийдвэр гаргасан байна.