АНУ-ын Сенат Дональд Трампыг зөвтгөсөн шийдвэр гаргажээ

АНУ-ын Ерөнхийлөгчид импичмент зарлах талаарх санал асуулга Конгрессын дээд танхимд болоход Трампыг буруугүй гэж шийдвэр гаргасан байна.

Америкийн Сенатад Трампыг Ерөнхийлөгчид нэр дэвшүүлсэн Бүгд найрамдах намынхан олонх байдаг. Тэгвэл Трампын эсрэг шийдвэр гаргуулахын тулд Сенатын гишүүдийн 2/3-оос багагүй санал авах хэрэгтэй байсан юм. Харин Бүгд найрамдах намынхан өөрийн хүнийг хэзээ ч унагахгүй гэдгээ анхнаасаа зарлаад байсан тул эцсийн үр дүн ийм байгаад гайхах зүйлгүй.

Хэдий ийм үр дүн гарах нь анхнаасаа ойлгомжтой байсан ч Конгрессын төлөөлөгчдийн танхим дах Ардчилсан намын олонх нь Ерөнхийлөгчийн сонгуулийн өмнө Трампын нэр хүндийг унагах оролдлого хийхэд ер илүүдэхгүй гэж тооцсон бололтой гэж шинжээчид үзэж байна.

Трамп Ерөнхийлөгч болсноосоо хойш дотоод ба гадаад бодлоготой холбоотой олон маргаантай шийдвэр гаргаж ирсэн. Гэвч Хятадтай худалдааны гэрээний эхний шатны тохиролцоог хийж АНУ-д үйлдвэрлэсэн 200 тэрбум долларын бараа, үйлчилгээг жил болгон заавал худалдан авдаг болгож чадсан нь түүний нэр хүндийг маш ихээр өргөсөн. Үүнээс өмнө түүний улс орныг болон гадаад олон улсын байдлыг зохицуулах чадварт олон хүн эргэлздэг байсан бол энэхүү тохиролцооны дараа хүндэлдэг хүний тоо эрс нэмэгджээ.