Трампыг буруутгагчид аргаа барж байгаа бололтой

АНУ-ын Ерөнхийлөгч Д.Трампт импичмент зарлах асуудлаар Конгрессын дээд танхим Сенат өнөөдөр санал хураалт явуулна. Конгрессын төлөөлөгчдийн танхим дах Ардчилсан намын олонх нь Трампт импичмент үзүүлэх хуулийг санаачилж, доод танхимд олон гэдгээ ашиглан батлуулж, Сенатаар хэлэлцүүлэхээр болгож чадсан. Гэвч Сенатад нь Трампыг Ерөнхийлөгчид дэвшүүлсэн Бүгд найрамдах намынхан олонх тул импичментийг дэмжихгүй гэдэг нь тодорхой болсон.

Иймд Америкийн Ардчилсан намынхан янз бүрийн сүржин мэдэгдэл хийх нь эрс нэмэгдсэн гэнэ. Тухайлбал, Конгрессын төлөөлөгчдийн танхим дах Трампын гол яллагч Адам Шифф нь Ерөнхийлөгчийг Аляск муж улсыг оросуудад өгч магадгүй гэсэн мэдэгдэл хийжээ.

“Breitbart”-ын мэдээлснээр Ардчилсан намын Адам Шифф нь Трамп Сенатын шийдвэрээр буруугүй болж таарвал цаашдаа бүр гаарч ёс бус зүйл хийнэ гэж анхааруулаад “Трамп дараагийн сонгуулийн үеэр дэмжлэг авах болзолтойгоор Аляскийг оросуудад өгч чадна. Эсвэл мань хүн Мар-а-Лаго дах эдлэн газар руугаа нүүж очоод улс орныг удирдах эрхийг хүргэн Жаред Кушнерт даатгаж магадгүй” гэсэн байна.

Сонгууль дөхөх тусам Трампын өрсөлдөгчид түүнийг Оростой, оросуудтай хуйвалдсан, Америкаас урвасан гэж янз бүрээр буруутгах нь улам бүр газар авч байгааг олон судлаач хэлж ярих болсон. Энэ мэт хий хардалт нь заримдаа хошин шогийн үзэгдэл мэт зүйл болж хувирч байна. Жишээлэхэд, тун саяхан АНУ-д ахиж газар хэрэгтэй байна гээд Гренланд арлыг Дани улсаас худалдан авах санал гаргаж байсан Трампыг газрын тосоор баялаг, стратегийн чухал ач холбогдолтой Аляск мужийг Орост найр тавин өгнө гэж ярих нь ямар ч утгагүй, аргаа барсны шинж гэж болохоор байгаа аж.

Цаашилбал, Айова мужид болсон Ардчилсан намаас Ерөнхийлөгчийн сонгуульд нэр дэвшигчийг тодруулах завсрын сунгааны санал хураалтын дүн одоо хүртэл гараагүй байна. Иймд Трамп Ардчилсан намынхныг тавлаж, сураагүй биш сунгааны дүнг будилуулсан хэрэгт оросуудыг буруутгах хэрэгтэй гэж зөвлөжээ