Аяллын усан онгоцноос коронавирусийн 10 тохиолдол илэрч, карантинд оржээ

Японы Йокогама боомтод түр тусгаарлагдаад байсан “Diamond Princess” нэртэй аяллын тансаг зэрэглэлийн усан онгоцноос шинэ коронавирусын 10 тохиолдол илэрсэн тул нэн даруй карантинд оруулан бүх зорчигчдын хамт боомтод тусгаарлан хөл хорьсон байна.

 “Diamond Princess” усан онгоцыг Хонконгийн боомтод зогсож байх зуур халдвартай хүн дээр нь гарсан гэсэн мэдээлэл ирсний дараа Йокогама боомтод түр тусгаарлан, сэжигтэй гэж үзсэн хүмүүсээс шинжилгээ аваад байсан. Гэтэл шинжилгээний хариугаар тус хөлөг дээрх 3500 жуулчнаас 10 хүн халдвар авсан нь тогтоогдсон байна. Өвдсөн хүмүүсийг нэн даруй тусгай машинаар эмнэлэгт хүргэжээ.

 “Diamond Princess” усан онгоц нь нэгдүгээр сарын 20-нд Йокогама боомтоос хөдлөн Японы Кюшү, Окинава арлуудаар дайрч нь дараа нь Вьетнам, Хонконгоор ороод хоёрдугаар сарын 2-нд Йокамад буцаж ирээд байсан ч ийнхүү өвчин илэрсний улмаас бүх зорчигчид ба багийн гишүүдийн хамт карантинд орж, тусгаарлагдахаас өөр аргагүй болжээ. Усан онгоцон дээр халдвар тараасан гэх 80 наста хүн нь нэгдүгээр сарын 20-оос 25-ы хооронд аялж байгаад Хонконг дээр бууж үлдэсний дараа долоон хүний бие огцом муудаснаар хэрэг мандсан аж.