Их Британид бензин хөдөлгүүртэй бүх төрлийн машиныг хориглоно

Их Британи нь 2035 он гэхэд бензи болон дизель хөдөлгүүртэй тээврийн хэрэгсэл төдийгүй гибрид машинуудыг худалдаалахыг бүрэн хориглох талаар мэдээлж байна. Их Британийн Ерөнхий сайд Борис Жонсоны захиргаанаас тараасан мэдэгдэлд “Засгийн газар нь бензин ба дизель хөдөлгүүртэй машин, микро автобусны борлуулалтыг бүр эрт буюу 2035 оноос бүрэн хориглохоор төлөвлөөд байна” гэж дурджээ.

Үүний өмнөхөн Их Британийн удирдлагууд нь 2040 он гэхэд бензин ба дизель хөдөлгүүртэй машинуудыг хориглож магадгүй гэж байсан ч гибрид машинуудыг мөн адил хориглох талаар яриагүй байсан юм.

Үүнээс өмнө Нидерландын нийслэл Амстердамын удирдлага нь 2030 оноос эхлэн хотын гудмаар бензин ба дизель хөдөлгүүртэй авто машинаар явахыг хориглосон. Ингэснээр 2030 оноос хойш Амстердам хотын гудамжаар гибрид машин ч явахгүй зөвхөн цахилгаан хөдөлгүүртэй эсвэл устөрөгчөөр ажилладаг машинууд л явдаг болно.

Ирланд улс мөн адил 2030 оноос хойш улс даяараа дотоод шаталтын хөдөлгүүртэй машин ашиглахыг хориглохоор болсон.

Германд зарим хотын төв рүү дизель хөдөлгүүртэй машин оруулахгүй хориг тавьсан. Ингэснээр Хамбург, Эссен, Берлин, Штутгарт хотын төв рүү Евро-6-аас доош стандарттай бүх төрлийн машиныг оруулахгүй гэсэн. Германы энэ жишээг АНУ-ын Калифорни мужи, Энэтхэгийн зарим муж ба Хятадын зарим газар нэвтрүүлэх гэж байгаа.

Норвегид 2025 оноос эхлээд бензин ба дизель хөдөлгүүртэй машиныг хориглох гэж байсан ч яараад хэрэггүй гэж үзээд гибрид ба цахилгаан машин худалдан авахад янз бүрийн хөнгөлөлт эдлүүлэх замаар асуудлыг шийдэх нь дээр гэж үзсэн байна.

Манай улс экологийн цагдаагийн алба гэж байгуулсан болохоор тун удахгүй зарим энэ мэт шийдвэрийн жишгийг дагаж л эхлэх бололтой. Тэгээд эхэлбэл утааны шүүлтүүргүй машинуудад асар өндөр торгууль ногдуулах арга хэмжээ авахаас эхлэх байх.