Майк Помпео Хятад, Оросын хөрөнгө оруулалтаас болгоомжлохыг Казахстанд сануулжээ

АНУ-ын Төрийн нарийн бичгийн дарга Майк Помпео өнгөрсөн амралтын өдрүүдэд Казахстан улсад айлчлахдаа хэд хэдэн дуулиантай гэж болохоор мэдэгдэл хийсэн тухай “DW” агентлаг мэдээлсэн байна.

Помпео нь Казахстаны ГХ-ны сайд Мухтар Тлеубердытэй уулзахдаа Хятадын мэдэлд байгаа Шинжаанд засан хүмүүжүүлэх төвд хоригдсон сая гаруй уйгарууд, казах үндэстэн хүмүүсийн талаар ярилцаад “АНУ нь бүх улс орныг нэгдэг эдгээр хэлмэгдүүлэлтийг зогсоохыг шаардахыг уриалж байна. Бид Хятадаас ирсэн дүрвэгсдийг аюулгүй хорогдох газраар хангахыг уриалж байна” гэжээ. Мөн тэрээр Хятадаас дүрвэн ирээд байгаа хэлмэгдсэн казах хүмүүсийн төрөл садантай уулзаж ярилцсан аж.

Үүнээс гадна Майк Помпео нь Казахстаны удирдлагыг АНУ-ын компаниудтай түлхүү хамтран ажиллахыг уриалсан байна. Ингэхдээ тэрээр “Бид ажил хэргийн сонголт хийх улс орноо чөлөөтэй сонгох Казахстаны эрхийг бүрэн дэмжиж байгаа ч Америкийн компаниудтай түншилбэл ямар ч улсад  хавьгүй илүү үр дүнтэй гэдэгт итгэлтэй байна” гээд ОХУ ба БНХАУ-ын улам бүр өсөн нэмэгдэж байгаа нөлөөний талаар Казахстаныг анхааруулжээ. Түүний бодлоор Хятад ба Оросын хөрөнгө оруулалт нь алсдаа улс орны тусгаар тогтнолд хор хүргэж болзошгүй аж.

Гэхдээ Казахстаны өнөөгийн удирдлага өөрийн хамгийн том хөрөнгө оруулагч болох Хятадтай муудах бодолгүй байгаа гэдгээ удаа дараалан мэдэгдсээр ирсэн. Тухайлбал, Казахстаны Ерөнхийлөгч Касым-Жоомарт Токаев ХБНГУ улсад айлчлах үеэр “DW” агентлагт ярилцлага өгөхдөө "Шинжаанд БНХАУ-ын иргэд амьдардаг. Олон улсын хүний эрхийн байгууллагуудаас өгдөг олон мэдээлэл бодит байдалд нийцдэггүй. Казахстан улс нь Хятадын эсрэг глобал фронтын үргэлжлэл байх ёсгүй" гэж мэдэгдэж байсан юм.