“Boeing” компани Энэтхэгт байлдааны 17 нисдэг тэрэг хүлээлгэн өгчээ

Америкийн “Boeing” компани Энэтхэгийг зэвсэгт хүчний захиалгаас 17 ширхэг “AH-64E Apache Guardian” байлдааны нисдэг тэрэг, 10 ширхэг байлдааны ачаа тээврийн “Chinook” нисдэг тэргийг хүлээлгэн өгсөн тухайгаа албан ёсоор мэдээлсэн байна.

Энэтхэг нь 2015 онд 2,2 тэрбум доллароор 22 ширхэг “AH-64E”, 15 ширхэг “Chinook” нисдэг тэрэг захиалаад байсан юм.

Энэтхэг нь “Boeing”  компаниас өмнө нь  зэвсэгт хүчин нь цэргийн ачаа тээврийн 11 ширхэг C-17 Globemaster III онгоц, тэнгисийн эргүүлийн 8 ширхэг P-8I онгоц худалдаж аваад байсан юм.

Сонирхуулахад, АНУ нь Энэтхэгийг ОХУ-аас агаарын довтолгооноос хамгаалах С-400 систем худалдан авахыг эрс эсэргүүцэж, худалдан авсан тохиолдолд хориг арга хэмжээ авна гэж анхааруулаад байсан юм. Гэвч Энэтхэгийн удирдлага шийдвэрээ өөрчлөхгүй гэж мэдэгдээд 5 тэрбум доллароор С-400 худалдан авахаар болсон.

Энэтхэгийг С-400 авах гэж байгаад АНУ төдийгүй хил залгаа Пакистан дургүйцлээ илэрхийлж, Оросоос зэвсэг худалдан авснаар хүчний тэнцвэр алдагдлаа, худалдан авалтыг хойшлуулах талаар хэлэлцээ хийх хэрэгтэй гэж мэдээлж байсан юм. Харин Пакистаны улс Энэтхэгийг АНУ-аас ийм олон тооны дайралтын нисдэг тэрэг, тэнгисийн эргүүлийн онгоц худалдаж авч байгаад ямар нэг тайлбар хийгээгүй, дургүйцлээ илэрхийлээгүй.