Эм ууж хяналтаас бултсан эмэгтэйг хайж байна

Хятадын Ухань хотоос гаралтай шинэ коронавирусын тухай мэдээ дэлхий дахины анхаарлын төвд байгаа. Энэ үхлийн аюулт вирусын тархалтыг улс болгон л урьдчилан сэргийлэхийг хичээж янз бүрийн арга хэмжээ авч байна. Тухайлбал, Хятадаас ирсэн онгоцны зорчигчдын биеийн халууны тусгай төхөөрөмжөөр заавал шалгаж болсон. Гэсэн хэдий ч таагүй тохиолдлууд бүртгэгдсээр байна. Жишээлбэл, халдварын голомт Ухань хотоос Парист нисэж ирсэн жуулчин эмэгтэй хяналтыг давж гарсан талаар Wechat олон нийтийн сүлжээнд сайрхан ярьсан явдал олныг цочроогоод байна.

Энэ эмэгтэйд Ухань хотоос нисэх замдаа өндөр халуурч, ханиалгах зэрэг шинж тэмдэг илэрч. Гэтэл тэрээр Парист газардсан даруйдаа эмнэлэгт хандахын оронд халуун шалгадаг үзлэгийг давж гарахын тулд халуун бууруулдаг, ханиад дардаг шинж тэмдгийн эсрэг эмийг өндөр тунгаар олон давхар ууж эхэлжээ. Ингэснээр халуун шалгах хяналтыг амжилттай давж гараад тэр тухайгаа Wechat-аар сайрхан ярьж. Харин түүний нутаг нэгтнүүд үүнд нь ихэд дургүйцэн Парис дах Хятадын элчин сайдын яам руу утсаар ярьж бүсгүйн тухай мэдээлсэн байна. Үүний дараа Хятадын Элчин сайдын яам тус эмэгтэйтэй утсаар ярьж, нэн даруй гоц халдвартын эмнэлэгт хандан шинжилгээ өгөхийг шаардахтай зэрэгцээд Францын холбогдох албадад анхааруулсан аж. Одоо энэ эмэгтэйг Франц даяар хайж байна.

Энэ зуур 2019-nCoV гэж нэрлэгдсэн коронавирусын халдвараар Хятадад өвдсөн хүний тоо огцом өссөн тухай мэдээ ирээд байна. Хятадын эрх баригчид өвдсөн хүний тоо өчигдөр буюу нэгдүгээр сарын  23-нд 644 хүн өвдсөн, 18 хүн өвчний улмаас нас барсан тухай мэдээлж байсан. Гэтэл өнөөдөр, нэгдүгээр сарын 24-нд ирсэн мэдээгээр өвдсөн хүний тоо 830 болж, нас барсан хүний 25 болсон төдийгүй 177 хүний бие маш хүнд гэж тодорхойлогдсон байна. Ингээд зогсохгүй ахин 1072 хүнийг өвчний халдвар авсан байж магадгүй гэсэн сэжигтэйгээр шалгагдаж байгаа юм байна.

Мөн Хятадын эрх баригчид Ухань хотоос гадна Сяньнин гэдэг өөр нэг хотыг коронавирусын халдварыг зогсоох үүднээс түр хааж, хөл хорио тогтоосон тухай мэдээ ирж байна. Мөн Чиби, Эжоу, Хуанган хотуудын нийтийн тээврийн хэрэгслийн ажлыг түр зогсоожээ.

Энэ халдвараар өвдсөн тохиолдол БНХАУ-аас гадна Япон, Өмнөд Солонгос, Тайланд, АНУ, Вьетнам, Саудын Арави, Сингапур зэрэг улсуудад бүртгэгдээд байгаа юм байна. Цаашид өвчний тархалт газар авч хоёрдугаар сард оргил үедээ хүрнэ гэж мэргэжилтнүүд тоолоод байгаа аж.