Украйны сүлдийг хэт даврагч бүлэглэлийн бэлэг тэмдгийн тоонд оруулжээ

Украйны сүлд болох гурван салаа сэрээг Их Британийн тусгай албадын гаргасан хэт даврагч бүлэглэлүүдийг ялган таних тухай  гарын авлагад оруулсан байжээ. Тус гарын авлагыг Их Британийн алан хядлагатай тэмцэх цагдаагийн албанаас багш ба эмнэлгийн ажилтнуудад зориулан 2019 оны зургаадугаар сард гаргасан байсныг Украйны Элчин сайдын яам сая л олж мэдсэн аж. Тус гарын авлагын хэт даврагч үзэлтнүүдийн шивээсний талаарх бүлэгт Украйны сүлд бүхий шивээсний зураг байрлуулаад “Украйны гурван салаа сэрээ (үндсэрхэг үзэлтнүүдийнх)” гэж тайлбарласан байж.

Улмаар Элчин сайдын яам “Twitter” хуудсаараа дамжуулан “Украйны сүлд, үндэсний бэлэг тэмдэг болсон гурван салаа сэрээг  Британийн багш ба эмнэлгийн ажилтнуудад зориулан алан хядлагатай тэмцэх цагдаагийн газраас гаргасан гарын авлагад оруулсан явдал дургүйцэл төрүүлэхээс өөр аргагүй зүйл. Үүнийг яагаад ч тайлбарлаж, зөвтгөн аргагүй юм” гээд нэн даруй залруулж, албан ёсны түвшинд уучлал гуйхыг шаардсан байна.