Хусит босогчдын пуужингийн довтолгооны улмаас 60 хүн амиа алджээ

Йемений хусит босогчдын “Ансар Аллах” бүлэглэл Мариб хотоос холгүй байрлах Засгийн газрын хээрийн сургуулийн төв рүү Иранд үйлдвэрлэсэн пуужингаар харван довтолсон тухай “Al Jazeera” мэдээлсэн байна. Дайралтын улмаас бэлтгэл хийж байсан 60 гаруй цэргийн албан хаагч шархадсан тухай “Al Arabiya” суваг мэдээлжээ.

Йемений Мэдээллийн сайд Моаммар аль –Эриани нь энэхүү дайралтыг Ираны генерал КасемСулейманийг хороосны хариуд хийсэн дайралт гэжээ. Тэрээр “Twitter” хуудсаараа “Ираны хөлсний цэргүүд ба хусит сайн дурынхан Ираны пуужин ашиглан дайрсан нь Сулейманийн аллагын хариуд өшөө авсан  үйлдэл. Энэ бол алан хядах ажиллагаа” гэжээ.

Йеменд 2014 оноос хойш Засгийн газар ба хусит босогчдын хоорондох мөргөлдөөн эхэлсэн.  Саудын Арабаар удирдуулсан эвслийн хүчин 2015 онд Засгийн газрыг хамгаалах нэрийдлээр цэргээ оруулсан явдал мөргөлдөөнийг улам гаруулсан байдаг.  Саудын Арави, Бахрейн, Катар, Кувейт, АНЭ, Египет, Иордан, Марокко, Пакистан, Судан зэрэг улсууд хамтарсан ажиллагаа явуулсны улмаас Йемен улсын хүн амын 80 хувь нь хүмүүнлэгийн тусламж шаардлагатай болж, дотоод дүрвэгчдийн тоо 3 саяыг давж гараад байгаа аж.