Хафтар Берлин орохын өмнө Грек улсад нууцаар айлчилж байна

Ливийн иргэний дайныг зогсоох талаар ярилцах Берлиний уулзалт дэлхийн нийтийн анхаарлын төвд байна. Гол сөргөлдөгч талууд болох Ливийн Үндэсний армийн маршал ХалифаХафтар ба Ливийн Үндэсний эв нэгдлийн Засгийн газрын тэргүүн Сарраж нар тус уулзалтад оролцохоор болсон. Уулзалтын үеэр талуудад “татгалзах боломжгүй санал тавих” байгууллага нь Европын холбоо гэгдэж байгаа. Гэтэл Европын холбооны гишүүн Грек улсын Ерөнхий сайд Мицотакис мэдэгдэл хийж Берлиний олон улсын хуралдаанаар Ливийн иргэний дайны талаар гэрээ байгуулахдаа Ливийн Үндэсний эв нэгдлийн Засгийн газар ба Туркийн хооронд байгуулсан Газрын дундад тэнгис дэх далайн бүсийг харилцан хуваах тухай санамж бичгийг хүчингүй болгосон зүйл заавал оруулах ёстой гэв. Хэрэв ингээгүй тохиолдолд энхийн гэрээний заалтуудыг Европын холбооны чуулга уулзалтаар дэмжүүлэхээр оруулж ирэх үед Грек улс гишүүний бүрэн эрхээ эдлэн хориг тавина гэж мэдэгдсэн байна. Учир нь, Сарраж ба Эрдоганы хооронд байгуулсан энэ санамж бичгийн дагуу Турк ба Ливийн дунд Газрын дундад тэнгист байдаг Грекийн арлууд ба Кипр арал нь тус тусын эргийн дагуух далайн ёроолоос шатдаг хийх олборлох эрхгүй болж таарсан.

Харин Ливийн Үндэсний армийн командлагч ХалифаХафтар нь энэ гэрээг эсэргүүцэгчдийн нэг бөгөөд өчигдөр Грек улсад маш нууц байдлаар гэнэт айлчилсан тухай мэдээ ирж байна. Грект хийх айлчлалын үеэр Хафтар нь Грекийн Ерөнхий сайд КириакосМициотакистай уулзана гэхээс өөр ямар нэг мэдээлэл байхгүй байна. Берлиний уулзалтад уригдаагүй Грек улсын Ерөнхий сайдтай уулзаж байгаа явдал нэлээд асуудал дагуулсан, ойлгомжгүй зүйл боллоо гэцгээж байна. Гэвч зарим шинжээчид үүнийг Берлиний энхийн зөвлөгөөний үеэр Турк улс ба Европын холбооноос ирж болзошгүй “татгалзах боломжгүй санал”-уудаас татгалзах таатай шалтгийг Хафтарт гаргаж өгөх тул заавал уулзах хэрэгтэй байсан гэж үзэж байна.