АНУ нь Хойд Солонгосын эсрэг нэмэлт хориг арга хэмжээ авчээ

Хойд Солонгосын эсрэг нэмэлт хориг арга хэмжээ авч байгаа тухайгаа АНУ-ын Сангийн яам нэгдүгээр сарын 14-нд мэдэгджээ. Энэ удаад Хойд Солонгосын “Korea Namgang Trading Corp” ба Хятадын “Beijing Sukbakso” компаниудыг эсрэг хориг арга хэмжээ авчээ.

НҮБ нь Хойд Солонгосыг хилийн чанадаас орлого олох зорилгоор гадаад руу ажлын хүч явуулахыг нь хориглосон атал энэ хоёр компани нь Хойд Солонгосын ажилчдыг гадаад руу гарч ажиллахад зуучилж байсан гэж АНУ-ын Сангийн яам тайлбарласан байна. “Namgang Trading Corporation” компани нь Хойд Солонгосын ажилчдыг ОХУ, Нигер, Ойрх Дорнодын орнууд руу явуулах ажил хийж байсан бол Хятадын “Beijing Sukbakso” нь энэ ажилд нь дэмжлэг үзүүлж байсан аж. Хориг арга хэмжээнд өртөснөөр АНУ-ын нутаг дээрх эдгээр компанийн бүх өмч, хөрөнгийг битүүмжлэх юм.

Өнгөрсөн долоо хоногт Хойд Солонгосын удирдлага нь цөмийн зэвсгээс бүрэн татгалзах нөхцөлтэйгөөр Америктай хэлэлцээгээ үргэлжлүүлэхээс татгалзсан. Тэд хариу болзол тавьж АНУ нь эхлээд Хойд Солонгосын эргийн орчим хээрийн сургууль хийхээс бүрэн татгалзах ёстой гэж мэдэгдсэн. Мөн ард иргэддээ хандан АНУ-ын хориг арга хэмжээний эсрэг “үхлийн тулаанд” бэлдэхийг уриалсан байна. Хойд Солонгосын “Минчжучосон” сонинд бичсэнээр дайсан улс орнууд Хойд Солонгосыг оршин тогтнохыг үгүйсгэж байгаа тул тэдэнтэй хийх тэмцэл нь үхлийн тулаан байх болно. Мөн эдийн засгаа хөгжүүлэхийн тулд хана нэвтлэн гарч, улаан гал руу үсрэх хэрэгтэй болно гэсэн байна.