Дэлхийн хамгийн баян хүн Австралийн түймрийг унтраахад 690  мянган доллар хандивлаад шүүмжлүүлэв

“Amazon” компанийн үүсгэн байгуулагч, дэлхийн хамгийн баян хүн гэгддэг ЖеффБезос Австралийн ойн түймэртэй тэмцэх санд 690 мянган доллар хандивласан явдал интернэт дургүйцлийг маш ихээр төрүүлжээ.

Түүнийг хөрөнгийнхөө хэмжээтэй дүйцэхүйц хандив өргөсөнгүй гэж хүмүүс шүүмжилжээ. Жишээлбэл, нэг шүүмжлэгч нь Twitter хуудсаараа “ЖеффБезос 1 минутад 149,29 мянган доллар олж байдаг. Иймд тэр 4,6 минутад олдог мөнгөө хандивласан болж таарч байгаа юм. Хэрэв тэр нэг өдрийнхөө орлогыг хандивласан бол 215 саяыг өгөх байлаа” гэж жиргэсэн байна.

Безосын хөрөнгийг янз бүрийн санхүүгийн үйл ажиллагааны математик дүйцлийн үүднээс шинждэг Jeff Bezos Math гэсэн өөр нэг бүртгэлтэй хэрэглэгч нь түүний өргөсөн хандивыг 3 минутын орлоготой адил гэж тодруулсан байна. Цаашлаад хөдөлмөрийн хөлсний доод хэмжээгээр цалинждаг америк ажилчин Безостой дүйцэх хандив өргөхөөр бол 0,36 доллар өгөх ёстой гэж тооцсон байна. Өөр нэг хэрэглэгч “ЖеффБезос 116 тэрбумтай. Хандив нь хөрөнгийнх нь 0,00059% байна. Хэрэв та 50 мянгатай бол 30 доллар хүрэхгүй мөнгө хандивлаад сонин хэвлэлийн тэргүүн нүүрний баатар боллоо гэсэн үг” гэж тооцсон байна. Харьцуулахад, жүжигчин Леонардо Ди Каприогийн үүсгэн байгуулсан “Earth Alliance” буяны сангаас Австралийн түймрийг унтраахад 3 сая доллар хандивлаад байгаа.

Австралид есдүгээр сараас хойш гарч байгаа ойн түймэр нь олон гектар газар юу ч үгүй шатаж, олон мянган байшин барилга нурам болж хувираад байгаа. Сиднейн их сургуулийн судлаачид энэ жилийн ойн түймрийн улмаас үхэж үрэгдээд байгаа амьтадын тоо толгой тэрбум давсан гэж мэдэгдсэн. Түймэрт автсан зарим газрын утаа нь дэндүү өтгөн болсон тул түймрийг агаараас унтраах боломжгүй болжээ.