Төрсөн өдрөөрөө бэлгэнд авсан тасалбараар тэрбум рубль хожжээ

Оросын Москва мужид амьдардаг НадеждаБартош гэдэг эмэгтэй арванхоёрдугаар сарын 31-нд төрсөн өдрөөрөө бэлгэд авсан сугалаагаар тэрбум рубль хожжээ. Энэ тухай “Русское лото” сугалааг зохион байгуулсан “Столото” компани мэдэгдсэн байна. Сугалааны тохирол 2020 оны нэгдүгээр сарын 1-нд явагдаж, зарлагчийн тасалбарыг зарласан ч ялагч нь ирэлгүй 9 хоноод байсан. Үүнээс болоод “Столото” компанийг хуурамч тохирол явуулж, хожил нэрээр мөнгийг луйвардсан гэх мэт янз бүрийн хардлага, үл итгэсэн байдал үүсээд байсан аж. Харин НадеждаБартош нь компанийн байранд нөхөр, охины хамт хүрэлцэн ирж хожлоо авснаар элдэв хардлага арилсан гэж байна. Оросын түүхэнд сугалаагаар тэрбум рубль хожсон тохиолдолд өмнө нь гарч байгаагүй аж.

Оны эхний өдөр болсон сугалааны ялагчдыг тодруулах тохиролд 59 сая тасалбар оролцсон гэж байна. Энэ тохирлын үеэр НадеждаБартош тэрбум рубль хожсон бол өөр 99 хүн сая рубль хожжээ. Сугалааны тасалбар үнэ 100 рубль.

Сугалааг зохион байгуулсан “Столото” компаниас сугалаагаар сая рубль хожсон хүмүүс мөнгөө юунд зарцуулдаг талаар судалгаа явуулсан байна. Ингэхэд ялагчид өрөө дарах, зээлээ төлөхөд хамгийн их мөнгө зарцуулж байжээ. Хожлын мөнгөө үрдэг дараагийн зүйл нь үл хөдлөх хөрөнгө худалдан авах. Харин зарлагын гурав дах зүйл нь аяллаар явах бол дөрөвдүгээрт нь өндөр зэрэглэлийн шүдний эмнэлгээр үйлчлүүлэн шүдээ янзлуулах гэж гарсан байна. Тавдугаарт нь буяны хандив, өглөгийн аянд идэвхтэй оролцдог гэдгийг судалгаагаар тогтоожээ.