Украйны “Боинг” хөдөлгүүрийн гэмтлийн улмаас сүйрсэн байж болзошгүй

Ираны арми Ирак дах Америкийн цэргийн баазууд руу пуужин харвасны дараахан Тегеран хотоос хөөрсөн Украйны зорчигч тээврийн “Боинг 737-800” загварын онгоц сүйрсэн эмгэнэлтэй явдал болсон байна. Ослын улмаас онгоцны багийн гишүүд ба зорчигчид гээд 176 хүн бүгд амиа алджээ. Үүний дараахан ослын шалтгааны талаар янз бүрийн таамаг дэвшүүлж эхэлсэн. Жишээлбэл, Арабын  зарим мэдээллийн хэрэгслүүд америкчууд хэзээ мөдгүй хариу цохилт өгч болзошгүй эгзэгтэй үе байсан тул Ираны агаарын довтолгооноос хамгаалах систем андууран буудаж унгасан байж болзошгүй тухай мэдээлж байсан. Гэвч онгоц нь Тегераны нисэх буудлаас хөөрснөөс ердөө 8 минутын дараа буюу нисэх буудлаас нэг их холдолгүй унасан нь тодорхой болсон. Иймд Ираны АДХ систем андуурсан гэх таамаглал ташаарсан гэдэг дээр ихэнх шинжээчид санал нийлж, хөдөлгүүрт гэмтэл гарсны улмаас сүйрсэн гэдгийг хамгийн өндөр магадлалтай гэцгээх болсон. Ослоор амь хүрэгдсэн хүмүүсийн 82 нь Ираны, 63 нь Канад, 11 нь Украйны, 3 нь Английн, 4 нь Афганистаны, 10 нь Шведийн, 3 нь Германы иргэд тус тус байжээ.

Ослын газар ирсэн Ираны мэргэжилтнүүд онгоцны хар хайрцгийг олсон байна. Гэхдээ Ираны тал нь хар хайрцгийг Украйнд шилжүүлж өгөхгүй, өөрсдөө бие даан шалгахаар болсон аж.

Энэхүү ослын дараагаар бүс нутагт нислэг үйлдэж байгаа нисэх компаниуд онгоцнуудаа Иран, Иракийн агаарын орон зайгаар дайрахыг хориглож эхэлжээ.

Мөн энэ осол гарсан өдөр буюу нэгдүгээр сарын найманд Израйлын Тель-Авив хотоос Руанда улсын нийслэл Кигали руу нислэг нисэх гэж байсан “Боинг 737-800” онгоцны хөдөлгүүр шатсан хэрэг гарсан. Гэвч азаар онгоц зурвасаас тасрахаас өмнө түймрийг илрүүлэн шуурхай арга хэмжээ авсны ачаар онгоцонд байсан 100 гаруй зорчигчдыг ослын гарцаар буулган эсэн мэнд буцаасан байна.