Австралид эрх баригчид цэвэр усны дутагдлыг арилгахын тулд 10 мянган тэмээг устгана

Австралид дэгдээд байгаа ойн түймрийн улмаас ундны усны дутагдал үүссэн тул Засгийн газар нь асуудлыг шийдэхийн тулд олон мянган тэмээг устгалд оруулахаар шийдсэн тухай “The Hill” бичсэн байна. Цэвэр усны дутагдлыг арилгах талаар судалгаа явуулсан Австралийн Засгийн газар нь ойн түймрийг унтраахад шаардлагатай усыг тэмээнүүд дэндүү их хэрэглэж байна гэсэн дүгнэлт хийсэн тул ийнхүү устгахаар болсон байна. Зэрлэгшсэн тэмээг устгах ажлыг Австралийн уугуул иргэд гол төлөв амьдардаг хойд нутагт явуулах юм байна. Таван өдөр үргэлжлэх устгалын үеэр 10 мянга гаруй тэмээг буудах ёстой гэнэ.

Австралид бизнесменүүд ачаа тээвэрт ашиглах зорилгоор ганц бөхт тэмээг 19 дүгээр зууны сүүлээр Аравийн хойгоос оруулж ирсэн байдаг. Анх ердөө зургаан тэмээ оруулж ирж байсан. Түүнээс хойш техникийн хөгжлийг дагаад тэмээний хэрэгцээ үгүй болоход алдагдсан, суллан тавьсан тэмээнүүд Австралийн халуун цаг агаарт богино хугацаанд дасан зохицож үржих болсон. Австралид тэмээн тоо толгойг хязгаарлаж чадах байгалийн махчин араатан үгүй тул тоо толгой нь богино хугацаанд өссөөр одоогийн байдлаар 300  мянгаас 750 мянга хүртэлх тооны ганц бөхт тэмцээ байгаа гэсэн тооцоо гарчээ. Түймэргүй ердийн үед ч тэмээнүүд нэг худаг дээр 200 гаруй тоо толгойгоор цуглаж хонь болон бусад амьтадыг усгүй үлдээх явдал элбэг байж.

Австралийн хойд нутагт гантай байгаа тул тэмээнүүд усыг илүү ихээр хэрэглэх болсон нь уугуул иргэдийн суурин газрууд хямралд ороод байгаа гэнэ. Жишээлбэл, тэмээн сүрэг ус хайн уугуул иргэдийн орон байр руу дайран орж, дэд бүтцийн байгууламжуудын эвдсэн хэрэг бүртгэгдээд байгаа аж.

Австралид ойн түймэр өнгөрсөн оны есдүгээр сараас хойш тасралтгүй үргэлжилж байгаа юм. Түймрийн улмаас 19 хүн амиа алдаж, олон  мянган байшин барилга шатаж, олон сая араатан амьтад устаад байгаа юм.