Маршал Хафтарын хүч Сирт хотыг эзэлжээ

Иран ба АНУ-ын хооронд дайн дэгдэж болзошгүй эгзэгтэй үед Ливийн иргэний дайн улам эрчээ авч байна. Тухайлбал, Маршал Хафтарын удирдаж буй Ливийн үндэсний арми нь Ливийн Сирт хотыг нисэх буудал ба тэнгисийн боомтын хамт эзлэн авсан тухай “Sky News Arabia” мэдээлжээ.

Ливид хоёр Засгийн газар эрх мэдлийн төлөө ширүүн тэмцэл явуулж байгаа юм. Нийслэл Триполи болон ойролцоох мужуудад НҮБ, Европын холбооны хүлээн зөвшөөрсөн Үндэсний эв нэгдлийн Засгийн газар байгаа бол улсын дийлэнх хэсэгт нь парламентаас нь байгуулж, Хафтарын “Ливийн үндэсний арми” дэмжиж байгаа түр Засгийн газар үйл ажиллагаа явуулж байгаа. Хафтар нь өнгөрсөн оны арванхоёрдугаар сарын сүүлээс нийслэл Триполийг эзлэх шийдвэрлэх дайралтад ороод байгаа. Ялагдал хүлээж эхэлсэн Үндэсний эв нэгдлийн Засгийн газар нь өөрийн мэдлийн мужуудаас цэрэг татаж, мөн Турк улсаас цэргийн тусламж авах гэрээ байгуулан ширүүн эсэргүүцэл үзүүлж байгаа юм. Турк нь энэхүү гэрээний дагуу Үндэсний эв нэгдлийн Засгийн газрыг талд тулалдуулахаар Сирийн нутгаас өөрийн дэмждэг зэвсэгт бүлэглэлүүдийг Ливи рүү зөөж эхэлсэн төдийгүй ҮЭН-ийн Засгийн газрын цэргүүдийг сургахаар мэргэжилтнүүдээ явуулж эхэлсэн байна.

Турк нь Газрын дундад тэнгис дэх нөлөөллийн бүс хуваалцах тухай нууц гэрээг ҮЭН-ийн Засгийн газартай байгуулсан тул ийнхүү Ливийн иргэнийн дайнд энэ Засгийн газрыг дэмжин оролцох зайлшгүй шаардлагатай болсон гэж шинжээчид үзжээ. Энэхүү гэрээний дагуу Турк нь Газрын дундад тэнгис дэх Кипр арлын тойрсон бүх усыг мэдэлдээ оруулах эрх зүйн үндэслэлтэй болж, цаашдаа энэ хэсгийн далайн ёроолоос илэрсэн асар их шатдаг хийн асар том орд газруудаас олборлолт явуулах боломжтой болох юм. Энэ орд газар нь яваандаа Европыг шатдаг хийгээр хангах бас нэг эх үүсвэр болно гэж тооцогдож байгаа. Иргэний дайнд маршал Хафтарын арми ялбал Турк ба ҮЭН Засгийн газрын хооронд байгуулсан бүх гэрээг хүчингүй болгож, Турк нь Крит арлыг тойрсон орд газраас олборлолт хийх эрх зүйн үндэслэлгүй болж хувирах юм. Иймд Турк нь ҮЭН Засгийн газрын талд Ливийн иргэний дайнд оролцохдоо сул дорой Засгийн газрыг ялуулах гэж бус харин эсэргүүцэл үзүүлэхэд туслах замаар гал зогсооход хүргэн хэлэлцээг эхлүүлээд яваандаа эвслийн засгийн газар байгуулж, өмнө нь байгуулсан гэрээгээ хүчин төгөлдөр хадгалж үлдэхийг хичээх болно гэж мэргэжилтнүүд үзжээ.