Украйны хэт үндсэрхэг үзэлтнүүд нацистуудыг дуурайсан бамбарт жагсаал хийжээ

1933 онд Гитлерийг Германы канцлераар сонгогдсоны дараа нацистуудын зохион байгуулж байсантай адил бамбарт жагсаалыг Украйны хэт үндсэрхэг үзэлт нам байгууллагууд өнгөрсөн лхагва гарагт Киев хотын төвд албан ёсны зөвшөөрөлтэйгөөр хийсэн байна. Тэд Украйны үндсэрхэг үзэлтнүүдийн байгууллагыг үүсгэн байгуулагч Степан Бандерагийн 111 жилийн ойг ийм аргаар тэмдэглэжээ. Тэд “Нэг улс – нэг үндэстэн” гэх мэт уриа хашхирч бамбарын дөл дор сүржин жагсаал хийж, жагсаалыг цагдаа, Үндэсний гвардийнхан хамгаалж явсан байна. Үүнтэй яг адил арга хэмжээг Украйны баруун нутгийн олон хотод зохион байгуулжээ.

Степан Бандера нь Украйны хэт үндсэрхэг үзлийн гол номлогчдын нэг. Украйныг Зөвлөлтөөс тусгаар улс болгохын төлөө идэвхтэй тэмцэж байсан. Улмаар 1941 онд Гитлерийн Герман Зөвлөлт рүү дайрахад нацистуудын талыг идэвхтэй дэмжиж байсан. Гэвч Германы төв удирдлагаас зөвшөөрөл авалгүй дураар дургих нь хэтэрсэн тул нацистууд түүнийг баривчлан бөөнөөр хорих лагерьт хорьсон байдаг. Хожим украйны үндсэрхэг үзэлтнүүд нь тохиолдлоор бамбай хийн Бандераг нацизмын эсрэг тэмцэгч гэж тунхаглах болсон. Дайны үеэр Бандерагийн номлолын дагуу үйл ажиллагаа явуулж байсан украйны хэт үндсэрхэг үзэлтнүүд нь “нутгаа цэвэрлэх” нэрийдлээр Баруун Волынь нутагт амьдарч байсан 100 мянган гаруй польш, чех, унгар, еврей хүмүүсийг украйн биш гэсэн цор ганц шалтгаанаар онц хэрцгийгээр хоморголон устгасан байдаг. Иймд эдгээр улсуудад Бандераг одоо ч дэлхийн хоёрдугаар дайны үеийн цэргийн гэмт хэрэгтэн, нацист гэж үздэг хэвээр бөгөөд Украйны эрх баригчдыг Бандераг магтан сайшаасан мэдэгдэл, үйлдэл хийх болгонд эрс шүүмжилдэг.