Украйны Засгийн газар ба салан тусгаарлагчид олзны хүмүүсээ солилцжээ

Украйны Засгийн газар сүүлийн хоёр жилийн хугацаанд анхны удаад Донбасс ба Луганск дахь салан тусгаарлагчидтай олзны хүмүүсээ солилцсон байна. Ням гарагт болсон солилцооны үеэр Донбасст олзлогдсон 51 хүн, Луганскт олзлогдсон 25 хүнийг Украйны талд буцаан өгсөн бол Киев нь Донбасст  61, Луганскт 63 олзны хүнийг нь буцаан өгсөн гэж байна.

Солилцоог Олон улсын Улаан загалмайн хороо ба Европын аюулгүй байдал ба хамтын ажиллагааны зөвлөлийн төлөөлөгчдийн ажиглалт дор явуулсан байна. Ийнхүү хоёр жилийн дараа олзны хүмүүсээс солилцож байгаа ОХУ, Герман, Францын удирдлагууд удахгүй Минскийн тохиролцоог дайтагч талууд бүрэн хэмжээгээр биелүүлж эхлэх, улмаар Украйн дах иргэний дайн зогсохыг эхлэл өндрөөр үнэлсэн байна.

Украйны удирдлага нь босогчдод олзлогдоод буцаж ирсэн хүмүүст тооцох ёстой эрүүгийн, захиргааны гэх мэт бүх хэргийг шүүхээс хүчингүй болгоно гэсэн амлалт өгсөн гэж байна. Харин Киевийн буцаасан хүмүүсийн дунд Донбасс, Луганскийн хүмүүс бараг байгаагүй гэж салан тусгаарлагчид онцолсон байна. Олзны гэгдэн Донбасс, Луганскт солилцоогоор ирсэн хүмүүсийн дийлэнх нь Мариуполь, Красноармейск, Краматорск, Харьков зэрэг хот Киевийн хяналтад байдаг хот тосгоны оршин суугчид байсан, мөн Оросын иргэн сайн дурын дөрвөн хүн, Бразилийн иргэн нэг хүн босогчдын талд ирсэн гэж мэдэгдсэн байна.

Үүнээс өмнө 2017 оны арванхоёрдугаар сарын 27-нд иргэний дайны оролцогч талууд олзны хүмүүсээ солилцож байсан юм. Тэр үед Киев нь салан тусгаарлагчдад 233 олзны хүнийг нь буцаан өгч байсан бол босогчид Украйнд 73 хүн хүнийг нь буцаан өгч байжээ.