Австралид +41 хэм хүртэл халж байна

Австрали даяар агаарын температур Цельсийн +41 хэм хүрч өмнөх "дээд амжилтыг" эвдээд байгаа тухай "Associated Press" мэдээлсэн байна. Тодруулбал, арванхоёрдугаар сарын 17 –нд Австралийн цаг уурчид улс даяар агаарын хэм +40,9 хэм хүрснийг бүртгэн авчээ. Ингэснээр 2013 оны нэгдүгээр сарын 7-нд Австралийн нийт газар нутгаар Цельсийн +40,3 хэм хүртэл халж байсан өмнөх дээд үзүүлэлт эвдэгджээ. Гэхдээ Австрали даяар агаарын хэм дараагийн өдрүүдэд бүр ч нэмэгдэнэ гэж цаг уурчид үзсэн байна. Энэ хооронд хэсэг газрын агаарын халуун бүр ч ихээр нэмэгдсэн байна. Австралийн Квинсленд мужид +47,7 хэмийн халуун бүртгэгджээ.

Энэ зуур Дэлхийн цаг уурын байгууллагын албан ёсны төлөөлөгч Женев хотноо сэтгүүлчидтэй уулзахдаа 2019 оны арваннэгдүгээр сарыг цаг агаарын 148 жилийн ажиглалтын түүхэнд хоёрдугаарт орох дулаан арваннэгдүгээр сар байсан гэж мэдэгджээ. Хамгийн халуун арваннэгдүгээр сарыг 2016 онд бүртгэж байсан бөгөөд тэр үед ЭльНиньо нэртэй байгалийн үзэгдлийн улмаас дэлхий даяар халуун байсан аж. Ер нь 2010-2019 онуудыг дэлхийн ажиглалтын түүхэн дэх хамгийн халуун арван жил тооцохоор болоод байгаа аж.